Xitoyning Alibaba Foundation xayriya jamg‘armasi va ushbu internet-kompaniya asoschilaridan biri hisoblangan Jek Maning fondi koronavirusga qarshi kurash uchun yetti mamlakatga, xususan, O‘zbekistonga yordam yuklarini yuboradi, deya xabar bermoqda “Gazeta.uz”.
Businesswire xabariga ko‘ra, tibbiy yordam yuklarini O‘zbekistondan tashqari Ozarbayjon, Qozog‘iston, Qirg‘iziston, Hindiston, Vyetnam va Butan oladi.
Ushbu yetti mamlakat umumiy hisobda 1,7 million dona yuz niqobi, COVID-19 koronavirusini aniqlash imkonini beradigan 165 mingta test to‘plami, tibbiy himoya liboslari va tibbiyot uskunalarini, jumladan, peshona termometrlari va sun’iy nafas oldirish apparatlarini qabul qilib oladi.
Tibbiy yordamning dastlabki reysi Hindistonga uchib ketgan. O‘zbekiston va boshqa mamlakatlarga yaqin vaqt ichida Xitoydan samolyotlar keladi.
Avvalroq Alibaba Foundation va Jek Ma fondi koronavirusga qarshi kurash maqsadida boshqa davlat va mintaqalarga, xususan, Janubiy Sharqiy Osiyo, Yevropa Ittifoqi mamlakatlariga, shuningdek, AQShga yordam yuborgan edi.
Ushbu fondlar Xitoy, Piter Doerti nomidagi Infeksiyalar va immunitet instituti (Avstraliya) hamda Kolumbiya universiteti (AQSh)dagi koronavirusni davolash bo‘yicha tadqiqot va ishlanmalarni ham moliyalashtirmoqda.
Avvalroq O‘zbekiston Rossiya, Xitoy va Singapur kabi mamlakatlardan 300 mingta ekspress-test va 500 ta sun’iy nafas oldirish apparati xarid qilishi kutilayotgani haqida xabar berilgan edi. Ma’lumot uchun, O‘zbekistonda 29-mart Toshkent vaqti bilan soat 17:00 holatiga ko‘ra, 133 kishi kasallangan, ikki kishi vafot etgan, yetti kishi sog‘aygan.
Izoh (0)