«Ҳизбуллоҳ» сиёсий ва террорчилик ташкилоти Ливан ҳукумати ва Соғлиқни сақлаш вазирлигига коронавирус тарқалишига қарши кураш йўлида ёрдам бериш мақсадида 24 мингдан ортиқ шифокор, ҳамшира ва волонтёрларни тайёрлади. Бу ҳақда «Ҳизбуллоҳ» ижроия кенгаши раҳбари Ҳошим Сафиуддинга таяниб, «РИА Новости» хабар берди.
«‘Ҳизбуллоҳ’нинг коронавирусга қарши кураш режасидан 1,5 минг шифокор, 3 минг нафар тиббиёт ходими, 5 минг нафар соғлиқни сақлаш соҳасидаги ходим ва 15 минг волонтёр ўрин олган. Жами 24 500 киши соғлиқни сақлаш ва тиббий хизмат кўрсатиш вазифаларини бажаради», — дейилади хабарда.
«Ҳизбуллоҳ» ҳаракати вакилининг маълум қилишича, мамлакатда коронавирусга боғлиқ вазиятнинг бир неча сценарийси кўриб чиқилмоқда ва барча ҳаракатлар ҳукумат ҳамда Соғлиқни сақлаш вазирлиги билан мувофиқлаштирилган ҳолда олиб борилади. «Соғлиқни сақлаш вазирлигининг ҳар қандай эҳтиёжи, у шифохоналар тайёрлаш бўладими ёки малакали кадрлар етишмовчилиги бўладими, биз таъминлашга тайёрмиз», — дейди Сафиуддин.
Таъкидланишича, «Ҳизбуллоҳ» томонидан Байрутда вирус билан касалланганларга ёрдам кўрсатиш мақсадида иккита шифохона тайёрланган, фавқулодда ҳолатлар учун хусусий клиникалар ижарага олиб қўйилган. «Биз коронавирус билан касалланганларни ташиш учун 100 та транспорт воситасини тайёрлаб қўйдик, уларнинг 25 таси сунъий нафас олдириш қурилмаси билан жиҳозланган дейди», — «Ҳизбуллоҳ» вакили.
Эслатиб ўтамиз, янги турдаги коронавирус оқибатида бутун дунё бўйлаб вафот этганлар сони 24 минг кишидан ошди. АҚШ коронавирус билан касалланганлар сони бўйича Хитойдан ҳам ўтиб кетди. Ўзбекистонда эса коронавирус юқтириб олганлар сони 83 кишига етган, етти нафарининг аҳволи оғирлиги айтилмоқда.
Изоҳ (0)