27 март куни Хитой Ташқи ишлар вазирлиги дунё бўйлаб коронавирус пандемияси тарқалиши сабаб визаси бор ёки яшаш ҳуқуқига эга бўлган чет элликларнинг мамлакатга кириши вақтинча чекланишини маълум қилди, деб хабар беради «Интерфакс».
«COVID-19’нинг дунё бўйлаб тезкорлик билан тарқалаётгани муносабати билан визаси бор ёки мамлакатда яшаш ҳуқуқига эга хорижликларнинг Хитойга киришини вақтинча тўхтатиб туришга қарор қилинди», — дейилади баёнотда.
Таъкидланишича, мазкур чеклов чораси 28 март соат 00:00 дан бошлаб амалда бўлади.
«Тўхтатиб туриш бу — коронавирус тарқалиши билан дунёда бўлаётган вазиятни ҳамда бошқа давлатлар тажрибасини инобатга олган ҳолда Хитой томонидан вақтинча қўлланилаётган мажбурий чорадир», — дейилади ТИВ хабарида.
Янги турдаги COVID-19 коронавируси дастлаб Хитойнинг Хубэй провинциясидан тарқалган. Инфекция эпидемияга айланиб, мамлакатдан ташқарида ҳам тарқала бошлади. Бироқ ҳозирга келиб Хитой касаллик билан самарали курашмоқда: касалланганларнинг 90 фоиздан ортиғи соғайиб кетди, пандемия ўчоғи бўлмиш Ухань шаҳрига қўйилган транспорт чекловлари қачон олиб ташланиши маълум қилинди. 26 март ҳолатига кўра, Хитойда бир суткада коронавирусга чалиниш билан боғлиқ 67 та ҳолат аниқланган бўлиб, уларнинг барчаси четдан юқтирилган. Сўнгги маълумотларга кўра, коронавирус билан касалланганлар сони бўйича АҚШ Хитойдан ўтиб кетган, вафот этганлар сони бўйича эса Италия биринчи ўринда кетмоқда.
Изоҳ (0)