Корхона ва ташкилотлар томонидан ходимлар учун навбатчи транспорт воситаси қатнови ташкил этилиши мумкин

Транспорт вазирлиги АОКАда бўлиб ўтган брифингда корхона ва ташкилотлар ходимларининг 22 мартдан бошлаб жамоат транспорти фаолияти тўхтатилганидан кейин ишга қандай қатнаши борасидаги саволларига жавоб берди.

Вазирлик матбуот котиби Наврўз Аширматовнинг сўзларига кўра, жамоат транспорти фаолиятини тўхтатиш тўғрисидаги қарор 21 март куни қабул қилинишида иш ҳафтаси 24 март кунидан бошланиши инобатга олинган. Айнан шу вақт оралиқда ташкилот ва муассасалар раҳбарлари вужудга келган вазиятдан келиб чиқиб, ходимлари ишхоналарга келиш-кетишини ташкил этиш бўйича масалаларни ҳал этишига имконият яратилган.

«Ташкилотлар томонидан ходимларини иш жойларига келтириш ва уйига қайтариш бўйича транспорт логистикасида муаммолар пайдо бўлса, ишни ходимнинг уйидан масофавий ташкил этиш ёки ходимларни таътилга чиқариш масаласини кўриб чиқиш тавсия этилди.

Шунингдек, корхона ва ташкилотлар ўз ходимлари ишхоналарга келиш-кетишини ташкил этиш бўйича навбатчи автобуслар қатновини йўлга қўйиш масаласида «Тошшаҳартрансхизмат» акциядорлик жамиятига мурожаат этиши мумкин», – деган Наврўз Аширматов.

Тошкент шаҳрида транспорт воситалари ҳаракатланишига жорий қилинган чеклов фақат жамоат транспорт воситаларига тегишли бўлиб, корхона ва ташкилотлар тасарруфидаги автотранспорт воситаларининг иш фаолиятига таъсир кўрсатмайди. Корхона ва ташкилотлардан ўз ходимларини ишга олиб келиш ва уйига олиб бориш жараёнида ҳамда хизмат вазифаларини бажаришда автотранспорт воситаларини ҳар куни мажбурий дезинфекция қилиш, техник ва санитария талабларига тўлиқ риоя қилиши талаб этилади.

«Тошкент шаҳрида фаолият юритувчи корхона ва ташкилотларга хизмат кўрсатувчи юк автомобиллари ҳаракатланиши давом этади. Шунингдек, почта ва курерлик хизмати билан шуғулланувчи автомашиналарга ҳам чекловлар мавжуд эмас», – дея қўшимча қилган Транспорт вазирлиги вакили.

Тадбирда Тошкент шаҳрида жамоат транспорти қатнови вақтинча тўхтатилгани боис ҳайдовчи ва чиптачилар вазият барқарорлашгунича ўз ҳисобидан таътилга чиқарилиши ҳам маълум қилинган.

Жамоат транспортларида ҳаракатланиш мақсадида апрель ойи учун харид қилинган ойлик йўл чипталари тўлиқ ўз қийматида қайтариб олинади.