Uzbekistan Airways 24 март куни Тошкент—Москва—Тошкент йўналиши бўйича чартер қатновлари амалга оширилишини маълум қилди.
Таъкидланишича, ушбу қатновлар Россия билан келишилган ҳолда фавқулодда ташкил этилган бўлиб, HY613 Тошкент—Москва (Внуково аэропорти) рейси маҳаллий вақт билан соат 13:05 да, HY614 Москва (Внуково аэропорти)—Тошкент рейси маҳаллий вақт билан 16:45 да кетади.
Чартер қатновга, аввало, Ўзбекистоннинг Россиядаги элчихонаси ходимлари томонидан тузилган рўйхатга мувофиқ навбат бўйича турган йўловчилар чақирилади.
Аввалроқ Uzbekistan Airways чет эллик фуқароларни Москвага ва ўзбекистонлик фуқароларни Москвадан Тошкентга олиб келиш учун 17 март куни Тошкент—Москва—Тошкент чартер рейсни амалга оширгани ҳақида хабар берилган эди.
Uzbekistan Airways экипажи ноқулай эпидемиологик ҳолатдаги мамлакатлардан қайтганидан сўнг, карантинда бўлиши сабабли хорижий фуқароларни Ўзбекистондан олиб чиқиш бўйича чартер рейсларни ташкил этиш 3 кунга қолдирилгани маълум қилинганди.Эслатиб ўтамиз, 16 мартдан бошлаб Ўзбекистон коронавирус сабаб авиа ва автоқатновларни тўхтатди. Хориждаги Ўзбекистон фуқароларини олиб келиш бўйича чартер рейслар амалга оширилади.
Изоҳ (0)