Шавкат Мирзиёев 20 март куни Қозоғистоннинг биринчи президенти – Нурсултон Назарбоев билан телефон орқали мулоқот қилди, деб хабар бермоқда Президент матбуот хизмати.
Қайд этилишича, суҳбат аввалида икки мамлакат етакчилари бир-бирларини ҳамда қардош Ўзбекистон ва Қозоғистон халқини яқинлашиб келаётган Наврўз байрами билан табриклади.
Шунингдек, Ўзбекистонда коронавирус инфекцияси тарқалишининг олдини олиш, шунингдек, унинг барқарор ижтимоий-иқтисодий тараққиётга ҳамда кўп қиррали Ўзбекистон—Қозоғистон муносабатларининг бугунги суръатига салбий таъсирини камайтириш борасида кўрилаётган қатъий чора-тадбирлар тўлиқ қўллаб-қувватланди.
Ҳукуматлар даражасида саъй-ҳаракатларни самарали мувофиқлаштириш ва яқиндан ҳамкорликни давом эттириш муҳимлиги қайд этилди.
Мулоқот чоғида икки томонлама муносабатларнинг долзарб жиҳатлари ҳам кўриб чиқилди, минтақавий ҳамкорлик ва халқаро аҳамиятга молик масалалар юзасидан фикр алмашилди.
Маълумот учун, Қозоғистонда коронавирусни юқтириб олганлар сони 49 нафарга етган. Мамлакатда оммавий тадбирлар бекор қилинди, мактаб ўқувчилари таътилга эртароқ чиқди, давлат органларига хорижга хизмат сафарига чиқиш тақиқланди. Фуқароларга қўл бериб кўришмаслик тавсия қилинди. Мамлакатда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинди. Бу даврда қозоғистонликлар мамлакатни тарк эта олмайди (хорижга даволаниш учун кетаётганлардан ташқари).
Ўзбекистонда эса коронавирусга чалинганлар сони 33 нафарга етди. Президент коронавирус пандемиясининг аҳоли турмуши ва иқтисодиёт тармоқларига салбий таъсирини юмшатиш масалаларига бағишланган видеоселектор йиғилиши ўтказди. Ўзбекистон Мусулмонлари идораси коронавирус даф бўлиши учун тавсия қилинган дуолар ва амалларни эълон қилди. Кўнгилли дастурчилар томонидан эса коронавирус ҳақида маълумот берувчи ўзбек тилидаги сайт ишга туширилди.Мавзуга доир: «Менга таъсир қилмайди, менга тегишли эмас экан, деганлар хато қилади». Президент коронавирусга қарши огоҳликка чақирди
Изоҳ (0)