Ўзбекистонда кўнгилли дастурчилар томонидан коронавирус ҳақида маълумот берувчи ўзбек тилидаги сайт ишга туширилди.
Ўтган бир неча кун давомида аҳолига ушбу касаллик бўйича янада кенгроқ маълумот етказиш мақсадида кўнгилли дастурчилар томонидан махсус сайт ишлаб чиқилди. Covidinfo.uz манзилидаги ушбу сайтда коронавирус инфекцияси билан боғлиқ муҳим маълумотлар ўзбек ва рус тилларида жойлаштирилган.
«Сайтда дастурий ишлар ҳамон давом этмоқда, бироқ бугунги вазиятдан келиб чиқиб, уни тест режимида ишга туширишга қарор қилдик. Ундаги маълумотлар сиз учун фойдали ва ишончли манба бўлади, деб ишонамиз», — дейилади сайт ижодкорлари хабарида.
Аввалроқ Ўзбекистон Соғлиқни сақлаш вазирлиги, Ахборот ва оммавий коммуникациялар агентлиги, Ёшлар иттифоқи, Масс-медиа фонди ва бошқа кўплаб ташкилот ва идоралар ҳамкорлигида «Koronavirus Info» Telegram канали очилган эди.
Бундан ташқари аҳолини қизиқтираётган саволларга жавоб бериш учун икки тилда фаолият кўрсатаётган махсус бот — @covidhelpuzbot ҳам яратилган.
Сўнгги маълумотларга кўра, Ўзбекистонда коронавирусга чалинганлар сони 23 кишига етган. Францияда бўлиб қайтган биринчи бемор аёлнинг яна уч нафар қариндошида коронавирус аниқланган. Аввалроқ унинг ўғли, қизи, турмуш ўртоғи, невараси, онаси, келини, яна бир қариндоши ва бир ҳамкасбида ҳам касаллик аниқланган эди.
Изоҳ (0)