Қашқадарёда қурилиши бошлаб юборилган, айни кунга қадар учинчи қаватигача кўтарилган 19 та кўп қаватли уй тендер савдосига қўйилди ва талабгор қурувчи изланмоқда. Ҳолбуки, мазкур уйлар қурувчиси аниқ.
Бу ҳақда «Дарё»га маълум қилган қурувчининг таъкидлашича, вилоятда ўтказилган тендер савдоси шунчаки кўзбўямачилик бўлиб, натижаси масъулларга олдиндан маълум бўлган.
«2020 йил январь ойида республика газеталарининг бирида уй-жойларни қуриш бўйича тендер савдоси эълон қилинди. Мазкур эълонга кўра, жорий йил Қашқадарё вилоятининг қишлоқ ҳудудларида 47 та кўп қаватли арзон уй-жойлар қурилиши белгиланган. Ажабланарлиси, тендер натижалари айни кунга қадар эълон қилинмаган бўлса-да, вилоятда 19 та уй қурилиши бошлаб юборилган. Ва аксарият тўрт қаватли уйларнинг уч қавати кўтарилган. Демакки, ҳали натижаси эълон қилинмаган тендер тақдири масъулларга маълум бўлган», — дейди шахсини очиқлашни истамаган қурувчи.
Қашқадарё прокурорининг биринчи ўринбосари Шерали Аширов имзолаган хатда 19 та кўп қаватли уй қурилиши «Қишлоққурилишинвест»нинг вилоят филиали буюртамаси билан танлов савдолари ўтказилмаган ҳолда бошлаб юборилганлиги тасдиқланади.
Мазкур уйлар қурилиши тўхтатилгани ёзилади.
Қурилиш соҳасида ҳудудий назорат инспекцияси бошлиғи Исмоил Қўзиев ҳам «Дарё» мухбири билан мулоқотда вилоятда тендер натижаси эълон қилинмасдан қурилиш ишлари бошлаб юборилганлигини тан олди.
«Шунинг учун ҳам ўзбошимчалик қилган қурувчи ташкилотлар устидан судга шикоят қилдик. Адашмасам, суд ҳам уларга жарима берди», — дейди Исмоил Қўзиев.
Исмоил Қўзиевнинг таъкидлашича, «Қишлоққурилишинвест»нинг вилоят филиали буюртмасига асосан, уй қуришни бошлаб юборган қурувчилар тадбиркор, шу боисдан ҳам мазкур ташкилот қурувчиларнинг ўзбошимчалигига жим қараб туришга мажбур.
«Улар тадбиркор, тадбиркор ишига тўғридан-тўғри киролмаймиз, Вазирлар Маҳкамаси ҳузурида тадбиркорлар ҳуқуқини ҳимоя қилувчи Омбудсман бор, уларнинг рухсати билан киришимиз мумкин. Биз ҳолат бўйича олган маълумотларимиз асосида судга мурожаат қилдик ва суд ҳукмига топширдик», — дейди Исмоил Қўзиев.
Исмоил Қўзиев вилоятда ноқонуний қурилган уй-жойлар сони 19 та эмас, айни кунда 6-7 тага етишини таъкидлаб, ушбу уйларнинг техник ва муаллифлик назорати ўтказилмаганлигини қўшимча қилди.
Мазкур уй-жойлар қурилишида қўлланилаётган қурилиш материаллари ва буюмларининг шаҳарсозлик нормалари ҳамда қоидаларига қай даражада мос келиши ҳамда стандартларига риоя этилиши устидан назорат ўрнатилмаганлиги инобатга олинса, демакки, мазкур уй-жойлар аҳоли яшаши учун талабга жавоб бериш-бермаслиги ҳам сўроқ остида қолади.
«Ноқонуний қурилган уй-жойлар устидан назорат ҳокимликлар зиммасида бўлиши керак», — дейди ҳудудий назорат инспекцияси бошлиғи.
«Қишлоққурилишинвест» Қашқадарё вилоят филиали директори Қўйли Нарзуллаевнинг маълумот беришича, 2020 йил вилоятда ҳақиқатдан ҳам 47 та кўп қаватли арзон уй-жойлар қурилиши белгиланган бўлиб, мазкур уй-жойларнинг 45 таси тўрт қаватли, 2 таси беш қаватли қилиб қурилади.
Қўйли Нарзуллаев шартномасиз қурилиши бошлаб юборилган кўп қаватли уйлар Президент маслаҳатчиси хатига кўра бошланганини таъкидлар экан, қурилиши бошланган уй-жойларнинг тендер савдосига қўйилишини изоҳлай олмади.
«Қурилиши бошланган ва қурувчиси ҳам аниқ бўлган объектлар тендер савдосига киритилгач, бизга ўхшаган қурувчилар умид қилиб тендерга кириб, натижасиз чиқишимизга сабаб бўлади-ку. Бу эса тендер савдоларига нисбатан ишончсизлик уйғотади», — дейди мурожаатчи фуқаро «Дарё» мухбири билан суҳбати давомида.
Қўйли Нарзуллаев мазкур хатти-ҳаракатини Президент маслаҳатчиси Т.Худайбергеновнинг бош вазир А.Ариповга йўллаган хати билан асослашга уринса-да, мазкур хатда 2019 йил учун қўшимча уй-жой қурилиши лозимлиги ва айнан Қашқадарёда 20 та, жумладан, Қарши туманида 1 та уй-жойга эҳтиёж борлиги таъкидланади. Кузатувларимизга кўра, Қарши туманида 3 та кўп қаватли уй-жой тендерсиз қурилаётгани маълум бўлди.
Қарши туманининг Сахтапиёз ҳудудида 2 та тўрт қаватли уй қад ростлаётган бўлиб, бирини «Асл кафолат темир бетон буюмлари» МЧЖ, иккинчисини эса «Беҳруз Шуҳратович» хусусий корхонаси қураётгани маълум бўлди. Ровот массивидаги уйни эса «Акбар Альянс Нур» МЧЖ вакиллари қураётгани ойдинлашди. Шунингдек, Қарши шаҳрининг «Чўлқувар» ва «Рогузар» маҳаллаларида ҳам 5 қаватли уйлар қурилиши бошлаб юборилганига гувоҳ бўлдик.
Мазкур воқеалар Қашқадарё прокуратурасига маълум бўлса-да, ҳозирча бу ҳақда расмий маълумот берилмади.
Изоҳ (0)