Коронавирус ва спорт: Сербия президентидан «дакки еган» «Реал» ҳужумчиси, 5 марта қолдирилаётган Ҳабиб—Тони жанги ҳақида сўнгги маълумотлар

Коронавирус пандемияси кўплаб соҳалар қатори спортга ҳам катта зарар етказишда давом этмоқда. «Дарё» бу борадаги сўнгги маълумотлар билан таништиради.

Коронавирус ва футбол

19 март куни Туркия Суперлигаси ҳам вақтинча тўхтатилди. Мазкур лига Европада бекор қилинмаган иккита мусобақанинг бири бўлиб қолаётганди. Шу тариқа минтақада давом этаётган ягона турнир Беларусь чемпионати бўлиб турибди. Чемпионатнинг дастлабки турида Борисовнинг БАТЭ жамоаси сафарда «Энергетик БГУ»га мағлуб бўлди (1:3). Мазкур баҳсда ўзбекистонлик ҳужумчи Жасур Яхшибоев Беларусь лигасидаги дебют ўйинида дублга эришди.

Евро—2020 мусобақаси 2021 йилга сурилгани маълум қилинган эди. УЕФА қарорига кўра, мусобақа 2021 йилда ўтказилишига қарамасдан «Евро—2020» номини сақлаб қолади.

«Айнтрахт» футболчисида коронавирус борлиги аниқланди, бунинг натижасида бутун жамоа карантинга олинди.

«Реал» ҳужумчиси Лука Йович Сербия ҳукумати томонидан ўрнатилган карантин қоидаларини бузди. Бу масала мамлакат президентигача етиб борди. Александр Вучич Йович ва «Асколи» футболчиси Никола Нинковични кескин танқид остига олди.

Бу йигитлар — миллионер, шу сабаб улар ўзлари учун барчаси мумкин деб ҳисоблайди, бироқ сиз ҳаёлингизга келган ҳамма ишни қила олмайсиз. Барча қонунбузарлар қаттиқ жазоланади. Қилиш мумкин бўлган энг осон иш — уларни жазолаш.

Улар қилмишидан пушаймон ва иккиси ҳам изоляцияда, агар чиқишга уринадиган бўлса, ҳибсга олинади. Умуман олганда улар яхши йигитлар, мен уларни тушунаман.

Александр Вучич, Сербия президенти

20 март ҳолатига кўра Европа кучли бешлик лигаларида 23 нафар футболчи вирус юқтириб олган. Аввалроқ касалликка чалинган «Арсенал» устози Микель Артетанинг соғлиғи яхшиланган.

Бир қатор футбол вакиллари хайрия орқали коронавирусга қарши курашга ўз ҳиссасини қўшмоқда. ФИФА коронавирусга қарши кураш учун 10 миллион доллар ажратди. Златан Ибрагимович Италиядаги шифохоналарга ёрдам тариқасида пул йиғиш учун фонд очди ва ҳамкасбларини хайрия қилишга ундади. «Бавария» футболчилари Леон Горетцка ва Йозуа Киммих коронавирусга қарши кураш учун 1 миллион евро хайрия қилди.

«Манчестер Юнайтед» ва «Ливерпуль» жамоалари мавсум қандай якунланишидан қатъий назар барча ҳодимларга маош тўлашини маълум қилди.

Коронавирус рақамларда

Спорт оламида 112 киши коронавирусга йўлиқди (шулардан 84 нафари футбол). Улардан энг кўпи: Испания (24), Италия (11) ва Буюк Британия, Германия (6). 4 киши вафот этди (Эрон 2, Испания 1, Португалия 1) ва уларнинг барчаси футбол вакиллари. 9 нафар инсон тузалиб кетган.

Икки нафар испаниялик спорт журналисти Хосе Мария Кандела (59 ёш) ва Томас Диас-Вальдес (78 ёш) коронавирусдан вафот этди.

Ҳабиб ва Тони жанги қолдириладими?

UFC енгил вазн тоифаси чемпиони Ҳабиб Нурмагомедов ва Тони Фергюсон ўртасидаги Нью-Йоркдаги баҳс ҳам расман бекор қилинди. Ташкилот президенти Дэйна Уайт жангни бошқа жойда ўтказишга уринмоқда, бироқ Уайт 20 март кунги баёнотида беллашув 18 апрелдан кейинга сурилиши мумкинлини айтди. Шу тариқа Тони ва Ҳабиб қарама-қаршилиги тарихда бешинчи бор қолдирилиши мумкин. Аввалроқ мазкур яккакурашчилар ўртасидаги жанг турли сабабларга кўра тўрт бор қолдирилганди.

Бокс бўйича тўрт йўналиш Жаҳон чемпиони Энтони Жошуа ва болгариялик Кубрат Пулев ўртасидаги 20 июнга мўлжалланган жанг ҳам коронавирус туфайли қолдирилди.