«Реал» клуби ҳужумчиси Лука Йович коронавирус сабаб Сербия ҳукумати томонидан ўрнатилган карантин қоидаларини бузганликда гумон қилинмоқда, дея хабар қилмоқда Sky Sports.
Таъкидланишича, Сербия терма жамоаси вакили ўтган ҳафтада Белградга келган ва 28 кун карантинда бўлиши керак эди. Бироқ уни пойтахт кўчаларида кўришган ва Йович машуқасининг туғилган кунига атаб ташкиллаштирилган кечада қатнашган.
Аввалроқ Сербия бош вазири Ана Брнабич карантин қоидаларини бузиш 12 йилгача бўлган қамоқ билан жазоланиши ҳақида айтганди. Ички ишлар вазири Небойша Стефанович Йович билан юзага келган ҳолат юзасидан фикр билдирди.
«Машҳур спортчи эканинг ва пулинг кўплиги бу жазодан қутулиб қолдинг дегани эмас. Улар ёки қонунни ҳурмат қилади, ёки қамоққа равона бўлади», — дейди Стефанович.
Йовичнинг ўзи эса қонунни бузмаганини таъкидламоқда.
«Барча учун, айниқса шифокорлар учун қийин кечаётган сўнгги кунларда янгиликларнинг асосий мавзусига айланиб қолганимдан афсусдаман. Испанияда топширган қон таҳлилимдан коронавирус аниқланмади ва мен «Реал»дан рухсат сўраган ҳолда оилам, халқим билан бўлиш учун Сербияга қайтишга қарор қилдим. Самолёт қўнганидан кейин яна бир таҳлил топширдим ва бунисида ҳам вирус аниқланмади. Мен ҳақимдаги бу ёлғон маълумотларни тарқатганлар номидан барчадан узр сўрайман», — дея ёзади Йович Instagram саҳифасида.
20 март ҳолатига Сербияда коронавирусга чалинганлар сони 100 нафардан ошиб кетган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)