“Real” klubi hujumchisi Luka Yovich koronavirus sabab Serbiya hukumati tomonidan o‘rnatilgan karantin qoidalarini buzganlikda gumon qilinmoqda, deya xabar qilmoqda Sky Sports.
Ta’kidlanishicha, Serbiya terma jamoasi vakili o‘tgan haftada Belgradga kelgan va 28 kun karantinda bo‘lishi kerak edi. Biroq uni poytaxt ko‘chalarida ko‘rishgan va Yovich mashuqasining tug‘ilgan kuniga atab tashkillashtirilgan kechada qatnashgan.
Avvalroq Serbiya bosh vaziri Ana Brnabich karantin qoidalarini buzish 12 yilgacha bo‘lgan qamoq bilan jazolanishi haqida aytgandi. Ichki ishlar vaziri Neboysha Stefanovich Yovich bilan yuzaga kelgan holat yuzasidan fikr bildirdi.
“Mashhur sportchi ekaning va puling ko‘pligi bu jazodan qutulib qolding degani emas. Ular yoki qonunni hurmat qiladi, yoki qamoqqa ravona bo‘ladi”, — deydi Stefanovich.
Yovichning o‘zi esa qonunni buzmaganini ta’kidlamoqda.
“Barcha uchun, ayniqsa shifokorlar uchun qiyin kechayotgan so‘nggi kunlarda yangiliklarning asosiy mavzusiga aylanib qolganimdan afsusdaman. Ispaniyada topshirgan qon tahlilimdan koronavirus aniqlanmadi va men “Real”dan ruxsat so‘ragan holda oilam, xalqim bilan bo‘lish uchun Serbiyaga qaytishga qaror qildim. Samolyot qo‘nganidan keyin yana bir tahlil topshirdim va bunisida ham virus aniqlanmadi. Men haqimdagi bu yolg‘on ma’lumotlarni tarqatganlar nomidan barchadan uzr so‘rayman”, — deya yozadi Yovich Instagram sahifasida.
20-mart holatiga Serbiyada koronavirusga chalinganlar soni 100 nafardan oshib ketgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)