Коронавирус туфайли кинотеатрлар ёпилгани сабабли «Ўзбеккино» 30 та янги фильмни телеканалларда бепул намойиш этади

«Ўзбеккино» Миллий агентлиги ва Ўзбекистон телеканаллари биргаликда коронавирус профилактикаси кунларида «Уй кинотеатри» акциясини амалга оширади. Бу ҳақда «Ўзбеккино» Миллий агентлиги матбуот хизмати хабар берди.

Қайд этилишича, агентлик телевизион эфир вақтини тўлдириш учун давлат ва нодавлат телеканалларга кинофонддан 750 бирликдаги материалларни тақдим этади. Акциянинг биринчи босқичи 250 дан ортиқ киноматериаллар — ҳужжатли ва бадиий фильмлар (2015—2018 йиллар), мултфильмлар (2010—2018 йиллар), қисқа метражли фильмлар ҳамда болаларнинг севимли «Зумраша» киножурналининг янги сонлари (2016—2018 йиллар)ни ўз ичига олади.

Шунингдек, «Ўзбеккино» телеканалларга тақдимоти яқин икки ҳафта ичида ўтказилиши мўлжалланган 30 та янги фильмни тақдим этади. Улар орасида «Қўқон шамоли», «Авлоний», «Биринчи август» ва бошқалар бор.

«Бизнинг мақсадимиз — мамлакатимиз аҳолиси, айниқса, карантин тадбирлари давомида уйда, болалари билан қоладиган болалар ва катталарнинг бўш вақтини мазмунли ўтказишдан иборат», — дейди «Ўзбеккино» Миллий агентлиги бош директори Фирдавс Абдухолиқов.

Эслатиб ўтамиз, Ўзбекистон ҳукуматининг коронавирус тарқалишининг олдини олиш бўйича чора-тадбирлар ҳақидаги тавсияларидан келиб чиқиб, мамлакат миқёсида оммавий кўнгилочар томошалар, жумладан, кинотеатрлар фаолияти ҳам тўхтатилган.

Шу билан бирга, карантин кунлари ўқув муассасалари ёпилган, байрам тадбирлари, шунингдек, Наврўз тантаналари ва у билан боғлиқ бошқа оммавий маросимлар бекор қилинган.