Коронавирус пандемияси сабабли интернет тармоғида айнан ана шу эпидемиологик вазият билан боғлиқ фирибгарлик ҳолатлари кўпаймоқда. Бу ҳақда Ўзбекистон Республикаси Ахборотлаштириш ва телекоммуникациялар соҳасида назорат бўйича давлат инспекцияси «Ўзкомназорат» маълум қилди.
Хабар берилишича, фирибгарлар инфекциянинг олдини олиш учун зарур бўлган хавфсизлик чоралари ёзилган электрон хабарларни юборади. Бундан кўзланган асосий мақсад фойдаланувчининг сохта веб-сайтга кириши учун уни хабардаги ҳаволани босишга мажбур қилиш ҳисобланади. Сохта сайтда эса фойдаланувчидан шахсий маълумотларини бериш сўралади.
Бошқа турдаги хабарлар вируснинг тарқалишига қарши курашиш учун хайрия қилишни сўрайди ёки нуфузли ташкилотлар номидан оғир аҳволдаги беморларни даволаш учун маблағ талаб қилинади.
Бундан ташқари, сайтларда фойдаланувчининг коронавирус билан касалланган ёки йўқлигини аниқлаш учун тест сотиб олиш таклифлари ҳам берилади.
«Ўзкомназорат» фойдаланувчиларни ҳушёр бўлишга, нотаниш шахслардан келган хатларни ўчиришга, ҳаволаларни синчковлик билан ўрганишга ва нотаниш рақамлардан қўнғироқ қилинганда эҳтиёт бўлишга чақирган.
Шунингдек, инспекция фойдаланувчиларни коронавирус пандемияси ҳақидаги барча турдаги сохта хабарлардан огоҳлантирган ҳамда расмий ва тасдиқланган манбалардан маълумот олишни тавсия қилган.
Аввалроқ Ўзбекистонда коронавирус ҳақида ҳақиқий вазиятни сохталаштириб талқин қилаётган 33 та аккаунт аниқланган эди. Ахборот ва оммавий коммуникациялар агентлиги коронавирус билан боғлиқ вазиятга оид ёлғон хабар тарқатган Telegram’даги каналлар муаллифларига огоҳлантирув хатлари юбормоқда. Шу билан бирга, Ўзбекистонда коронавирусдан илк ўлим ҳолати рўй бергани, вертолётлардан дезинфекция учун дори сепилиши, карантин вақти кўчада юрган болаларнинг ота-оналари жаримага тортилиши ҳақидаги сохта хабарлар рад этилди.
Аҳоли орасида ваҳима чиқаришга қаратилган материалларни тайёрлаш ёки уларни тарқатиш мақсадида сақлаш 44 миллион 600 минг сўмдан 89 миллион 200 минг сўмгача миқдорда жарима ёки 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш билан жазоланади.
Аҳоли орасида ваҳима чиқаришга қаратилган маълумотлар ва материалларни ҳар қандай шаклда тарқатиш 66 миллион 900 минг сўмдан 89 миллион 200 минг сўмгача миқдорда жарима ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.
Изоҳ (0)