Голливудча камситиш: Хилари Дафф ва Жон Траволта йилнинг энг ёмон актёрлари бўлди (видео)

АҚШда «Олтин малина» мукофоти совриндорлари аниқланди, деб хабар берди Cosmopolitan.

Мукофотнинг бош совриндорлари 66 ёшли Жон Траволта ва 32 ёшли Хилари Даффга насиб қилди.

Ҳамма актёрлар олишга қўрқадиган ушбу мукофот 1980 йилда таъсис этилган. Мукофот энг ёмон лойиҳаларга берилади. Жорий йилда «Энг ёмон актриса» номинациясида «Шерон Тейт арвоҳлари» фильмидаги роли учун актриса Хилари Дафф ғолиб бўлди.

Актриса ўз ўлими ҳақидаги ваҳийлардан азият чекувчи ҳомиладор аёл образини яратган. Ушбу номинацияда Энн Хэтэуэй, Франческа Хейуорд, Тайлер Перри ва Ребел Уилсонларниинг ҳам номзоди кўрсатилган эди.

Таҳқирловчи мукофотни Жон Траволта ҳам қўлга киритди. «Ишқибоз», «Елкама-елка» фильмларидаги ижролари унга «Энг ёмон актёр» номинациясидаги иккинчи «Олтин малина»ни олиб келди.

2001 йилда ҳам актёр «Бахтли рақамлар» ва «Жанг майдони: Ер» фильмларидаги роллари учун энг ёмон актёр сифатида эътироф этилган эди.

Режиссёр Томас Хупернинг «Мушуклар» мюзикли жорий йилда энг кўп «Олтин малина»ни қўлга киритди. Картина «Энг ёмон фильм», «Энг ёмон иккинчи даражали актёр», «Энг ёмон иккинчи даражали актриса», «Энг ёмон режиссёр», «Энг ёмон сценарий»  ва «Энг ёмон экран комбинацияси» номинацияларида тақдирланди.

Ўтган йили Дональд Трампга ҳам «Олтин малина» берилган эди. «Жокер» фильми билан қизиқ вазият кузатилди: Фильм «Оскар»га ҳам, «Олтин малина»га ҳам номзод сифатида кўрсатилди.