Warner Bros. Pictures студияси Европада янги турдаги COVID-19 коронавируси тарқалгани сабаб «Матрица 4» фильмининг суратга олиш ишларини вақтинча тўхтатишга қарор қилди, деб хабар беради «Кинопоиск».
Суратга олиш ишлари Берлинда амалга оширилаётган картина номаълум муддатга тўхтатиладиган бўлди. Актёрлар таркиби ҳамда суратга олиш гуруҳи аъзолари орасида коронавирус билан касалланиш ҳолати қайд этилмаган.
«Матрица» фильмининг тўртинчи қисми сюжети қандай бўлиши ҳақида маълумотлар йўқ. Warner студияси ва режиссёр Лана Вачовски лойиҳа деталларини барчадан сир тутишга уринмоқда. Тасдиқланмаган миш-мишларга кўра, фильмда Лоренс Фишбёрн ижросидаги ёш Морфеус пайдо бўлади.
Киану Ривз ва Кери-Энн Мосс яна бир бор Нео ва Тринити ролларини ижро этади. Жада Пинкетт Смитт Найроби ролига қайтади. Шунингдек, лойиҳага Приянка Чопра, Жонатан Грофф, Жессика Хенвик ва Нил Патрик Харрис жалб этилган.
«Матрица» — илмий-фантастик жангари фильм бўлиб, ака-ука Вачовскилар томонидан суратга олинган. Фильмда Киану Ривз, Лоуренс Фишбёрн, Керри-Энн Мосс ва Хьюго Уивинг бош ролларни ижро этган. 1999 йилда катта экранларга чиққан фильм бутун дунё бўйича катта шуҳрат қозонган.
Аввалроқ таниқли Голливуд актёри Том Хэнкс ҳамда унинг рафиқасида, британиялик актёр Идрис Эльбада, шунингдек, Ольга Куриленкода коронавирус аниқлангани ҳақида хабар берилган эди.
Эслатиб ўтамиз, коронавирус сабаб Шенген зонаси ва Европа Иттифоқининг ташқи чегаралари 17 мартдан кириш учун ёпилди.
Изоҳ (0)