GM Brazil расман Chevrolet Cobalt ишлаб чиқаришни тўхтатди. Бу ҳақда Бразилия ОАВларида тарқалган хабарларга таяниб, Spot хабар берди.
Ушбу моделни ишлаб чиқариш 2019 йилнинг охирида тўхтатилган эди ва эндиликда дилерлар қолган маҳсулотларни сотиш билан шуғулланмоқда. Компания Chevrolet Onix’нинг муваффақиятли савдоси Cobalt харидига таъсир кўрсатганини тан олган.
«Компания юқори самарадорликка эга Onix Plus ишлаб чиқаришни йўлга қўйганидан буён истеъмолчилар Cobalt’дан янги моделга ўта бошлганига гувоҳ бўлди», — дейилади хабарда.
Шундай қилиб Ўзбекистон Chevrolet Cobalt модели йиғиладиган ягона давлатга айланиб қолди, аввалроқ Колумбия ҳам ушбу моделни йиғишни тўхтатган эди.
Январь ойининг бошида UzAuto Motors компанияси Nexia, Spark, Gentra, Cobalt’ни янги моделларга алмаштириш ниятида эканлиги ҳақида хабар берилганди. Хусусан, Ўзбекистонда 2020 йилдан Chevrolet Onix ишлаб чиқарилиши керак эди.
Эслатиб ўтамиз, UzAuto Motors компанияси 9 мартдан автомобиллар учун янги нархларни 3 фоиздан 21 фоизгача оширди. Машиналар нархининг бундай кескин тарзда оширилиши кўплаб норозиликларга сабаб бўлди.
Изоҳ (0)