Таниқли ёзувчи Мурод Муҳаммад Дўст UzAuto Motors мутасаддиларининг депутат ва сенаторлар билан бўлган учрашувини ОАВ орқали кузатганини билдириб, ушбу тадбирда мутасаддилар берилган саволларга ёлғон жавоб қайтарганлигини қайд этди. Бу ҳақда «Kun.uz» хабар берган.
«Сездимки, корхона мутасаддилари кўп ёлғон гапларни гапирди. Бу уларнинг юз-кўзидан шундоқ сезилиб турганди. Биласизми, Ўзбекистоннинг автомобиль заводи ўзини оқламади. Оқлаши мумкин эди, қачонки у ҳақиқий бозор қоидалари асосида ишлаганида.
Эсингизда бўлса, 2008 йилда бутун дунё бўйлаб иқтисодий инқироз кузатилди. Ўша пайти мен бизда иқтисодий инқироз бўлмайди, деб айтгандим. Чунки иқтисодий инқироз иқтисод бўлган жойда кузатилади. Эътибор берган бўлсангиз, бизда ҳақиқатан ҳам инқироз бўлмади», – дейди киноя билан ёзувчи.
Кўп йиллар давлат раҳбарияти ҳузурида турли масъулиятли лавозимларда ишлаган Мурод Муҳаммад Дўст суҳбат давомида ҳукумат эндиликда монополист корхонани қўллаб-қувватлашни бас қилиши лозимлигини таъкидлади.
«Жиддий гапирадиган бўлсам, ҳукумат ўзининг ўйинларини қўйиб, бу монополист корхонани умуман қўлламаслиги керак. У чегарадаги божларни камайтириши, одамларга эркин автомобиль сотиб олиши учун имконият яратиб бериши шарт. Агар у халқни ўйласа, унинг аҳволидан куюнса, шундай қилади.
UzAuto Motors раҳбарияти мард бўлса, ҳақиқий рақобатга кучи етса, бозор қоидалари бўйича ишласин», – деди у.
Ёзувчининг айтишича, ўзбек автосаноати фаолиятида алоҳида шахслар манфаати устуворлик қилади.
«Бу ерда қандайдир бир тўданинг манфаати бор. Эсингизда бўлса, бир пайтлар корхона ичидаги шахслар томонидан автомобиллар четга чиқарилиб, яна Ўзбекистонга қайтариб сотилган ҳолатлар ҳам бўлган», – дея қўшимча қилди суҳбатдош.
Мурод Муҳаммад Дўст «Миллий тикланиш» партияси раиси Алишер Қодировнинг мулоқотдаги ҳаракатларидан қаттиқ ранжиганини ҳам билдирган.
«Алишер Қодиров деган депутатнинг гаплари, ҳаракатларини ҳамма кўрди. Биласизми, кишида уят бўлиши керак. Агар у адолат қилолмаса, жим туриши керак. Киши ҳеч бўлмаса, золим тарафида бўлмаслиги керак.
Тушуняпсизми, халқ сайлаган вакил халқни қийнаётганлар тарафидан гапиряпти», – деди у.
Ёзувчининг сўзларига кўра, автозаводда машиналар ишлаб чиқарилмайди, балки шунчаки йиғилади.
«Иккинчидан, заводда автомобиль шунчаки терилади. Бунинг учун хом ашё ташқаридан олиб келинади ва тўртта ғилдирак, рул қўйиб сотилади. Бу – спекуляция (фойда олиш, бойиш мақсадида камёб нарсаларни сотиб олиб, уларни қиммат нархда пуллаш, сотиш, чайқовчилик).
Ҳозир чиқарилаётган қиммат автомобиллар ҳам шундай қилинади. Бу ҳам спекуляция. Ҳозирги завод эгалари шунчаки воситачилар. Улар бор нарсани ‘тақ-тақ’ қилади ва устига шунчаки ўзининг маркасини қўйиб қўяди.
Давлат автомобиллар учун чегараларини очиши керак. У барибир тариф бўйича фойдани олади. UzAuto Motors шу шарт билан ишлай олса, ишласин, бўлмаса керак эмас», – деган Мурод Муҳаммад Дўст.
Мавзуга доир:
Изоҳ (0)