Тошкентда янги уч қаватли кўприк бўйлаб қайси йўналишлар очиқ бўлиши маълум қилинди

Тошкент шаҳридаги уч қаватли кўприк очилиши олдидан ҳайдовчиларнинг қайси йўналишларда ҳаракатланиши мумкинлиги ҳақида хабар берилди.

Тошкент шаҳар ҳокимлиги матбуот хизматининг ёзишича, 17 март куни соат 8:00 дан Паркент, Темур Малик ва Махтумқули кўчалари кесишмасидаги айланма ҳаракат қуйидаги йўналишлар орқали амалга оширилиши мумкин:

1. Паркент кўчасидан Оҳангарон кўчаси томондан қурилаётган кўприк томон ҳаракатланиб келаётган транспорт учун — айланма ҳаракатни бошлаш Махтумқули («Ташселмаш» мавзеси тараф), Темур Малик кўчаси (Қорасув мавзеси) ва Оҳангарон кўчасига қайрилиб олиш;

2. Темур Малик кўчасидан кўприк томон ҳаракатланиб келаётган транспорт воситаси Махтумқули кўчаси («Ташселмаш» мавзеси тараф) орқали айланма ҳаракатни бошлайди ва унга Оҳангарон кўчасига бурилиш рухсат этилади.

Шунингдек, пойтахт ҳокимлиги матбуот хизмати ҳайдовчилардан хушёрлик, йўл ҳаракати хавфсизлиги қоидаларига риоя қилишни сўраган ва яқин вақт ичида транспортлар ҳаракати тўлиқ тикланишини маълум қилган.