Ўзбекистоннинг 2020 йилги Иқтисодий эркинлик индексидаги ўрни кўтарилди, деб хабар бермоқда Молия вазирлиги матбуот хизмати.
АҚШнинг The Heritage Foundation ташкилоти томонидан юритиладиган Иқтисодий эркинлик индексининг 2020 йил учун ҳисоботида Ўзбекистон 57,2 балл билан 114-ўринни эгаллади. Бу 2019 йилги кўрсаткичдан (53,3 балл билан 140-ўрин) сезиларли юқори.
Қайд этилишича, мазкур индекс хорижий инвесторлар томонидан доимий кузатиб борилади ва Ўзбекистоннинг индексдаги ўрни юқорилаши тадбиркорлик муҳитига ижобий таъсир кўрсатиб, тўғридан-тўғри инвестициялар оқимининг ошишига хизмат қилади.
Иқтисодий эркинлик индекси тўртта асосий йўналиш бўйича 12 та таркибий кўрсаткичдан ташкил топган бўлиб, мулкчилик ҳуқуқи, суд фаолияти самарадорлиги, давлатнинг яхлитлиги, солиқ юки, давлат харажатлари, фискал саломатлик, бизнес эркинлиги, меҳнат бозори эркинлиги, монетар эркинлик, савдо эркинлиги, инвестициялар эркинлиги ва молиявий эркинлик каби соҳаларда жаҳон мамлакатларини 0 дан (энг паст) 100 гача (энг юқори) бўлган шкалада баҳолайди.
Ўзбекистон мазкур индекснинг қуйидаги таркибий кўрсаткичларида энг юқори ўсишга эришди:
- инвестициялар эркинлиги — 20,0 балл (+10 балл);
- молиявий эркинлик — 20,0 балл (+10 балл);
- мулкчилик ҳуқуқи — 59,1 балл (+9.3 балл).
Шунингдек, Ўзбекистон ўтган йилга нисбатан 26 поғонага юқорилаб, МДҲга аъзо мамлакатлар орасида энг жадал ўсишни қайд этди.
Маълумот учун: The Heritage Foundation иқтисодий таҳлил маркази томонидан 180 та давлатнинг Иқтисодий эркинлик индекси 1995 йилдан буён юритиб келинади.
Изоҳ (0)