Жанубий Корея Европадан келувчи хорижликларнинг мамлакат ҳудудига киришида уларни текширишда бошқача усулдан фойдаланмоқда. Бу кореяликлардан ташқари ҳар қандай давлат фуқароларига тааллуқли жараён, дейди Корея Республикаси соғлиқни сақлаш вазири ўринбосари Ким Ган Нип. Бу ҳақда «РИА Новости» хабар қилган.
«COVID-19 коронавируси глобал пандемиясига қарши кураш фавқулодда чора-тадбирлари Марказий штаби сўнгги вақтларда мамлакатга касаллик аломатлари ва коронавирус ташхиси билан кириб келаётган шахслар сони ўсиб бораётганини инобатга олиб, 19 мартдан бошлаб Кореяга кириб келаётган давлат фуқаролари ва хорижликлар учун алоҳида тартиб жорий қилинишини эълон қилади», — дея таъкидлаган Корея соғлиқни сақлаш вазири ўринбосари махсус брифингда.
Унинг сўзларига кўра, коронавирус мамлактда тарқала бошлаганидан бери 15 мартга қадар Жанубий Кореяда 44 та ҳолатда инфекциянинг хориждан кириб келгани кузатилган, жумладан, 14 нафар бемор Хитойдан, яна 14 нафар одам Осиёнинг бошқа давлатлари ва 16 нафар киши Европадан кириб келган.
Бироқ охирги уч кунда коронавирус хориждан қайтган олти нафар кореяликда кузатилган. Шу сабабли касалланганлар сони Америка қитъаси ва бошқа ҳудудларда ҳам ўсиб бораётганини ҳисобга олиб, алоҳида тартиб жорий этилади.
Тартибга кўра, кутиб олиш залларида алоҳида текшириш амалга оширилади: одамларнинг тана ҳарорати ўлчанади, турли сўровномалар ва декларациялар тўлдирилади, келаётган давлатдаги аниқ манзил кўрсатилади ва ишлаб турган алоқа телефони кўрсатилади, шунингдек, тиббиёт текширувлари хулосасини бериб бориш учун махсус мобил илова ҳам юклаб берилади.
Соғлиқдаги ўзгаришлар ҳақида 14 кун давомида мунтазам хабардор қилиб туриш лозим. Коронавирус аломатлари пайдо бўлганда хориждан келган одам алоҳида назоратга олинади ва вирус бўйича текширув тестидан ўтказишга юборилади. Шунингдек, коронавирус билан касалланганлар сони кўп бўлган давлатларга борганлар ҳақидаги маълумотлар маҳаллий ҳокимликлар, тиббиёт муассасалари ва дорихоналарга ҳам юборилади.
«Хориждан келганларнинг кутиш вақтини камайтириш мақсадида иловада мустақил диагностика қилиш учун мобил телефон рақами орқали идентификациялаш тизими киритилади ва унда турли тилларда ишловчи хизматлар мавжуд», — деган Ким Ган Нип.
Мавзуга доир:
Россия 1 мартдан бошлаб «Аэрофлот» ва Korean Air самолётлари учун «Шереметьево» аэропортидаги F терминалини ёпган ва Жанубий Корея билан авиақатновларни вақтинча тўхтатган. Жанубий Корея ҳам Сеул ва Москва рейсларини 25 апрелгача тўхтатилганини эълон қилди.
Мавзуга доир: «Аэрофлот» Ўзбекистонга парвозларни вақтинча тўхтатди
Изоҳ (0)