Украина Президенти Владимир Зеленский фуқароларга COVID-19 коронавирус инфекцияси тарқалишининг олдини олиш чоралари сифатида мамлакатда жорий этилган карантин пайтида демографик инқирозга қарши курашишни тавсия қилди. «РБК»нинг хабар беришича, бу ҳақда у ICTV телеканалида намоёш этилган дастур эфирида маълум қилди.
«Бизда инқироз борлигини биласиз, аммо ҳеч ким демографик инқирозни бекор қилмади. Мен бу инқирозга қарши курашиш вақти келди, деб ўйлайман», — деган у.
Зеленский, шунингдек, ватандошларига карантин пайтида яқинлари билан кўпроқ вақт ўтказиш, китоб ўқиш ва фильмлар томоша қилишни тавсия қилган.
«Биз уйда қолишимиз керак — бу вазиятдан чиқишнинг энг яхши йўли. Агар иситмангиз бўлса, зудлик билан шифокор чақиринг, биз ёрдам берамиз», — дея сўзларини якунлаган президент.
Аввалроқ Зеленский Олий Радага барча барлар, савдо марказлари ва спорт залларининг ишлашини тақиқлашни таклиф қилган. Ушбу чоралар 17 март, сешанба куни, ярим тундан кучга кирди. Шу билан бирга, ресторан ва кафеларга тайёр овқатларни уйларга етказиб бериш хизматига ўтишга имкон берилади. Шунингдек, вирус тарқалишига қарши чора сифатида метрони 18 март, чоршанба куни, пешиндан кейин ёпиб, шаҳар ва туманлар ўртасида темир йўл, авиа ва автобус ҳаракатини тўхтатиш таклиф қилинган.
Эслатиб ўтамиз, Украинада биринчи марта коронавирус билан касалланиш ҳолати 3 март куни аниқланганди. 12 март куни Украинанинг Житомир вилоятида коронавирус инфекцияси билан касалхонага ётқизилган 71 ёшли аёл вафот этди. Киевда 12 мартдан бошлаб коронавирус бўйича карантин жорий этилди, оммавий тадбирлар тақиқланади ва мактаблар ёпилди.
Украина Соғлиқни сақлаш вазирлигининг 13 мартдаги маълумотларига кўра, Житомир вилоятидаги ҳолатдан ташқари мамлакатда коронавирус билан касалланиш бўйича яна иккита ҳолат аниқланган, уларнинг иккаласи ҳам Черновци вилоятида қайд этилган. 2020 йил бошидан бери Украина Соғлиқни сақлаш марказига COVID-19 да гумонланиб, 55 та хабар келиб тушган, уларнинг 49 таси тасдиқланмаган, учтаси текширилмоқда.
Изоҳ (0)