Ўзбекистонда юридик шахс ташкил этмасдан хусусий нотариуслик фаолияти билан шуғулланишга рухсат беришни кўзда тутувчи «Нодавлат нотариал фаолиятни тартибга солувчи норматив-ҳуқуқий ҳужжатларни тасдиқлаш тўғрисида» ҳукумат қарори қабул қилинди. Бу ҳақда Адлия вазирлиги хабар берди.
Қарор билан Хусусий амалиёт билан шуғулланувчи нотариуслар фаолиятини ташкил этиш тартиби тўғрисидаги низом тасдиқланди.
Мавзуга доир: Ўзбекистонга орадан 10 йил ўтиб хусусий нотариуслар қайтмоқда. Энди давлат нотариуслари нима бўлади?
Низомга кўра, хусусий нотариус юридик шахс ташкил этмасдан фаолият юритади, банкда ҳисобварақ очади, ходимлар билан меҳнат шартномаси тузади, иш фаолиятини ташкил этиш учун мутахассислар ва юридик шахслар билан фуқаролик-ҳуқуқий шартномалар тузиш ҳуқуқига эга.
Хусусий нотариус ўз фаолиятини бошлашдан олдин фуқаролик жавобгарлигини мажбурий суғурта қилдириши шарт.
Нотариуснинг номида «хусусий амалиёт билан шуғулланувчи нотариус» сўзлари бўлиши, тегишли туман, шаҳар кўрсатилиши лозим. Хусусий нотариуснинг муҳри Адлия вазирлиги томонидан тасдиқланган ягона намунага мувофиқ тайёрланади.
Хусусий нотариус стажёр, ёрдамчи, котиб, нотариал фаолиятни ташкил этиш билан боғлиқ бошқа ходимларга (таржимон, курьер ва бошқалар) эга бўлиши мумкин. Хусусий нотариус ўзининг иш ва дам олиш вақтини мустақил белгилайди.
Нотариал ҳаракатлар «Нотариус» автоматлаштирилган ахборот тизими орқали амалга оширилади. Хусусий нотариус томонидан ундириладиган тушумлар давлат бюджетига солиқлар ва бошқа тўловлар тўлангандан сўнг нотариуснинг тасарруфига ўтади.
Изоҳ (0)