Ўзбекистонда коронавирусга чалинган саккиз кишининг орасида оғир аҳволдагилар йўқ, уларнинг аҳволи ёмонлашмаяпти. Бундан ташқари, 641 киши касалхоналарда, 5661 киши эса уй шароитида карантинга олинган. Бу ҳақда Ўзбекистон соғлиқни сақлаш вазири Алишер Шодмонов маълум қилди.
Фото: «Дарё»
Вазирнинг сўзларига кўра, касаллик аниқланган фуқаролардан бири — 15 март, якшанба куни, Туркиядан етиб келган беморда тана ҳароратининг юқорилиги аэропортда тепловизор ёрдамида ўтказилган дастлабки текширувда аниқланган. Шундан сўнг, мазкур фуқаро махсус тез ёрдам машинасида Вирусология марказига олиб борилган. Марказда текширувлар ўтказилган ва мазкур фуқарода коронавирус борлиги аниқланган.
Аниқланган ҳолатлардан яна бири — Франциядан келган бемор аёлнинг яқин қариндоши касалхонада назорат остида бўлган пайтда унда вируснинг борлиги аниқланган. Аёлнинг мазкур қариндоши у билан бевосита мулоқотда бўлгани сабабли вирусни юқтириб олганлиги айтилмоқда. Мазкур саккиз нафар фуқаро билан мулоқотда бўлган кишиларни аниқлаш ишлари давом эттирилмоқда.
Алишер Шодмоновнинг маълум қилишича, айни пайтда 641 киши тиббий муассасаларда карантинда турибди. Уларда касаллик аниқланмаган, лекин касалланганлар билан яқин алоқада бўлган. Жумладан, Вирусология илмий-текшириш институтида 49 нафар. Тошкент шаҳридаги 6-шифохонада 85 нафар, «Бўстон» санаторийсида 181 нафар, «Энергетик» санаторийсида Сеулдан олиб келинган 212 нафар фуқаро, хусусий шифохоналардан бирида 114 нафар фуқаро карантинга олинган. Карантинга олинганлар орасида тиббиёт ходимлари, ички ишлар идоралари, чегара ва божхона хизматлари ходимлари ҳам мавжуд.
Мавзуга доир: Коронавирусдан ҳимояланиш бўйича асосий чоралар
Вазирнинг қайд этишича, касалланганлар билан яқин мулоқотда бўлганлар шифохонада карантинга олинмоқда. Карантинга олинганлар билан мулоқотда бўлганлар эса уй шароитида карантинга олинмоқда. Икки куннинг ичида 5661 киши уй шароитида карантинга олинган.
Латвия ва Эрондан амалга ошириладиган чартер рейсларида олиб келинадиган фуқаролар Наманган вилоятидаги иккита тиббий муассасада карантинга жойлаштирилади. Бундан ташқари, бошқа бир қатор давлатлардан ҳам чартер рейсларини амалга ошириш режалаштирилмоқда. Олиб келинадиган фуқаролар учун тиббий муассасалар тайёрланган.
Мавзуга доир: Видео: Ўзбекистон Эронга коронавирусдан ҳимояланиш воситаларидан иборат гуманитар ёрдам жўнатди
Эслатиб ўтамиз, Ўзбекистонда коронавирус юқтириб олганлар сони саккиз нафарга етди. 15 март, якшанба куни, бир муддат аввал Францияда бўлиб қайтган ўзбекистонлик аёлда коронавирус аниқлангани ҳақида хабар берилган эди. Кейинчалик унинг ўғли, қизи, турмуш ўртоғи ва неварасида ҳам вирус аниқлангани маълум қилинган эди.
Олиб борилган таҳлил натижаларига кўра, Соғлиқни сақлаш вазирлигидан маълум қилишларича, ушбу бемор билан мулоқотда бўлган қариндошида ҳам коронавирус қайд этилган.
Бундан ташқари, 14 март куни Uzbekistan Airways’нинг Лондон—Тошкент рейсида келган Ўзбекистон фуқаросида ҳам коронавирус аниқланган. 15 март куни соат 05:15 да Uzbekistan Airways’нинг Истанбул—Тошкент рейсида келган Ўзбекистон фуқаросида ҳам коронавирус қайд этилган. Аввалроқ коронавирусга чалинган олти беморнинг аҳволи қониқарли экани маълум қилинган эди.
