Чехия ҳукумати COVID-19 коронавирус инфекциясининг тарқалишига қарши курашга бағишланган Вазирлар Маҳкамасининг бир неча соат давом этган йиғилишидан сўнг бутун мамлакат бўйлаб карантин жорий қилди, деб хабар берди «РБК».
Чеклов мамлакат аҳолиси фақат дорихоналар ва соғлиқни сақлаш муассасаларига бориш, озиқ-овқат сотиб олиш, қариндошларга ғамхўрлик қилиш ва ишга бориш учун уйдан чиқиши мумкинлигини кўзда тутади.
Чехия аҳолиси, шунингдек, банклар ва почтага ҳам бориши мумкин. Бошқа барча ҳолатларда мамлакат бўйлаб эркин ҳаракатланиш тақиқланади. Карантин чораларини назорат қилиш учун полиция икки мингдан ортиқ ҳарбий хизматчи ва 400 нафар божхона ходими жалб қилади. Беморларнинг учдан икки қисми вирусни чет элда юқтирган.
Эслатиб ўтамиз, айни пайтда Ўзбекистонда коронавирусга чалинган беморлар сони 4 нафарга етди.
15 март, якшанба куни, Францияда бўлиб қайтган ўзбекистонлик аёлда COVID-19 коронавирус инфекцияси аниқлангани ҳақида хабар берилганди. Шундан сўнг, аёл билан мулоқотда бўлган барча оила аъзолари Республика Вирусология илмий текшириш институти клиникаси ётқизилганди. Ундан ташқари, шу рейсда келиб, Ўзбекистонда қолган йўловчиларнинг бари аниқланиб, умумий ҳисобда 150 киши изоляцияга олингани ҳақида хабар берилганди.
16 мартдан Ўзбекистонда барча мактаблар, боғчалар ва ОТМлар карантинга ёпилди, Uzbekistan Airways маҳаллий ва халқаро авиақатновларни бекор қилди.
Қозоғистонда 16 мартдан фавқулодда ҳолат тартиби амал қилишни бошлади.
Изоҳ (0)