«Аэрофлот» Ўзбекистонга парвозларни вақтинча тўхтатди

Россиянинг «Аэрофлот» авиакомпанияси Марказий Осиё ва Европа давлатларига авиарейсларнинг вақтинча тўхтатилганини эълон қилди. Бу ҳақда компания расмий сайтида хабар берилган.

Ўзгаришларга коронавирус пандемияси сабаб бўлган. Чекловлар, жумладан, Москва—Прага—Москва (20 март—30 апрель кунлари), Москва—Франкфурт—Москва (19 март—30 апрель) рейсларига ҳам тааллуқли.

16 мартдан бошлаб Ўзбекистонга парвозларни амалга ошириш ҳам чеклаб қўйилган — Тошкент, Бухоро ва Самарқанд шаҳарларига парвозлар 16 мартдан 30 апрелга қадар амалга оширилмайди.

Шунингдек, 16 мартдан 30 апрелгача Москва—Салоники—Москва, 21 мартдан 30 апрелгача Москва—Барселона рейслари тўхтатилади. Бундан ташқари авиакомпания Копенгаген, Цюрих, Осло, Вильнюс, Кишинёв, Варшава, Вена ва Таллин шаҳарларига парвозларни ҳам 17 мартдан 30 апрелгача тўхтатади.

Аввалроқ «Аэрофлот» Жанубий Корея, Вьетнам ва Италияга парвозларни бекор қилганди. Қайд этиш жоиз, Uzbekistan Airways авиакомпанияси ҳам 16 мартдан 5 апрелгача (муддат узайиши мумкин) хориж давлатларига авиапарвозларни тўхтатган.Аввалроқ Ўзбекистонда коронавирусга чалиниш билан боғлиқ биринчи ҳолат қайд этилгани, 11 март, чоршанба куни, Uzbekistan Airways’нинг Париж—Тошкент рейси билан учиб келган аёл Республика Вирусология институтига мурожаат қилгани ва таҳлил натижалари унинг коронавирусга чалингани маълум бўлган.

Шундан сўнг унинг 9 нафар оила аъзоси, шунингдек, рейснинг Ўзбекистонда қолган йўловчилари ва улар билан мулоқотда бўлган одамлар — жами 150 киши изоляцияга олингани олинган. 16 мартдан бошлаб хорижий давлатлар билан барча авиарейслар бекор қилиниб, автотранспорт воситасида Ўзбекистонга кириш-чиқиш тўхтатилади.

Коронавируснинг Ўзбекистондаги март ойида бўладиган тўйларга таъсир кўрсатмаслиги, ҳукумат Ўзбекистондаги диний идораларга диний маросимлар ўтказишни вақтинча чеклаш бўйича илтимос билан мурожаат қилгани айтилди. Шунингдек, барча спорт (масалан, Суперлига), маданий (жумладан, концерт) ва бошқа тадбирлар, шунингдек, Наврўз тантаналари ва у билан боғлиқ бошқа оммавий маросимлар ҳам бекор қилинган.

Мамлакатда болалар боғчалари, ўрта мактаблар ва олий таълим муассасалари (давлатникими, хусусийми, фарқи йўқ) ҳам карантинга ёпилади. Тошкент шаҳар ҳокимлиги коронавирус профилактикаси доирасида Тошкент шаҳридаги бозорлар ёпилмаслиги, Ташқи ишлар вазирлиги эса Ўзбекистон фуқароларига ватанга қайтиш учун давлат чегарасидан ўтиш тақиқланмаганини маълум қилди.

Давлат солиқ қўмитаси раиси озиқ-овқат маҳсулотлари нархи назоратга олинишини билдирган.

Кейинчалик, Франциядан учиб келган аёлнинг ўғли ва қизида ҳам коронавирус инфекцияси аниқланди. Соғлиқни сақлаш вазирлиги 15 март, якшанба куни соат 05:15 да Истанбул—Тошкент йўналишидаги 274- рейс билан Тошкентга келган яна бир Ўзбекистон фуқаросида коронавирус инфекцияси аниқлангани ҳақида маълум қилди. Шу тариқа Ўзбекистонда коронавирус билан касалланганлар сони 4 нафарга етган.

15 март ҳолатига кўра бутун дунёда COVID-19 коронавирус инфекциясини юқтириб олганлар сони 156 минг нафардан ошгани хабар қилинган. COVID-19 келтириб чиқарган пневмония касаллигидан ўлганлар сони 5819 нафарни, тузалиб кетганлар эса 73,9 минг нафарни ташкил этган. Касалланиш ҳолатлари дунёнинг 142 та мамлакатида қайд этилган.