Хитой ҳукумати томонидан эълон қилинган статистика маълумотларига кўра, мамлакатда 2020 йилнинг дастлабки икки ойида саноат ишлаб чиқаришининг пасайиши сўнгги 30 йил давомида кузатилган энг салбий кўрсаткич бўлди. Бу ҳақда Reuters’га таяниб «РБК» хабар бермоқда.
Статистикага кўра, январь—февраль ойларида саноат ишлаб чиқариши ўтган йилнинг шу даврига нисбатан 13,5 фоизга тушиб кетган. Декабрь ойида эса, мамлакатда коронавирусга чалинганлар ҳали аниқланмаган вақтда бу кўрсаткич 6,9 фоизга кўтарилган.
Хабарда айтилишича, статистик кўрсаткичларнинг пасайиши кутилганидан ҳам паст бўлди. Энг катта муаммолар, савдо (20,5 фоизга пасайиш), асосий капиталга инвестициялар (24,5 фоизга) соҳаларида кузатилган.
Хитойдан экспорт қилиш январь—февраль ойларида 17,2 фоизга камайган.
Хитой расмийларининг мамлакатда коронавирус авж палласи енгиб ўтилгани тўғрисидаги баёнотларига қарамай, Reuters агентлиги келтирган таҳлилчилар Хитой иқтисодиёти нормал ҳолатга қайтиши учун яна бир неча ой керак бўлишини таъкидламоқда.
Қолаверса, инфекциянинг бутун дунёга тақрақалиши глобал рецессияга олиб келиши, бу эса Хитой товарларига бўлган талабга салбий таъсир кўрсатиши мумкин.
Бироқ, Хитойнинг ўзида коронавируснинг таъсири қисқа муддатли бўлиши ва ҳукумат томонидан кўрилган қатъий чоралар мамлакатдаги вазиятни тезда тиклаши таъкидланмоқда.
Аввалроқ Bloomberg экспертлари Коронавирус жаҳон иқтисодиётига 2,7 трлн долларгача зарар келтириши мумкинлигидан огоҳлантирганди.
Изоҳ (0)