LVMH концерни ўзининг парфюмерия ишлаб чиқарувчи линияларини қўлни дезинфекция қилувчи воситалар ишлаб чиқаришга йўналтиради. Бу ҳақда Meduza хабар берди.
Санитайзерлар Christian Dior, Givenchy ва Guerlain брендлар учун парфюмерия ишлаб чиқарувчи учта заводда ишлаб чиқарила бошлайди.
Қайд этилишича, ушбу заводлар Орлеан, Шартр ва Бове шаҳарларида жойлашган.
LVMH антисептикларни Франция Соғлиқни сақлаш вазирлигига тақдим этади. Маҳсулот етказиб бериш 16 мартдан бошланади. Концерн биринчи ҳафтада 12 тонна маҳсулот ишлаб чиқаради. Маҳсулот унга бўлган талаб тўлиқ қондирилгунга қадар ишлаб чиқарилади.
ЖССТ маълумотларига кўра, 15 март ҳолати бўйича Францияда коронавирусни юқтирганлар сони 4469 нафарни ташкил қилган. Саккизта ўлим ҳолати қайд этилган. Мамлакат касаллар сони бўйича Европада учинчи ўринда турибди. Ўзбекистонда қайд этилган биринчи ҳолатда ҳам бемор коронавирусни Францияда юқтириб келгани айтилди. Ҳозирда Ўзбекистонда коронавирусни юқтириш билан боғлиқ 6 та ҳолат қайд этилди. Беморларнинг аҳволи қониқарли эканлиги айтилмоқда.
Аввалроқ Франциядаги Эйфель минораси коронавирус сабаб ташриф буюрувчилар учун ёпилгани хабар берилган эди.
Франция президенти Эммануэль Макрон коронавирус сабаб Франциядаги барча таълим муассасаларини ёпиш бўйича топшириқ берган, шунингдек, у G7 давлатларининг раҳбарлари билан видеоконференция ўтказилиши, унда коронавирус оқибатлари, касалликка қарши вакцина ишлаб чиқиш, COVID-19 тарқалиши оқибатида юзага келадиган молиявий, иқтисодий муаммолар муҳокама қилинишини билдирган.
Изоҳ (0)