«Korzinka.uz» тармоғининг ҳисоб-китобларига кўра, ижтимоий тармоқларда бананлар орқали коронавирус юқиши мумкинлиги ҳақида гап-сўзлар тарқалгач, унинг савдоси уч баробарга тушиб кетган. Бу ҳақда супермаркет тармоғининг раҳбари Зафар Ҳошимов ўзининг Facebook’даги саҳифаси орқали маълум қилди.
«Telegram’даги гуруҳларда бир аёлнинг ваҳима оҳангида вилоятларнинг бирида коронавирус билан касалланганлар борлиги ва касаллик Хитойдан бананлар орқали келганини айтган аудиосини эшитиб, кулгим келди. Ахир мен бизнинг бананлар Хитойнинг яқинига ҳам йўламаслигини биламан-ку: улар Эквадорда етиштирилади ва Атлантика океани орқали Болтиқ денгизи портларига, у ердан Тошкентга олиб келинади. Ва бунда Тошкент бизнинг бананларни Хитойга бориши учун энг яқин маршрут ҳисобланади», — деб ёзади Ҳошимов.
Унинг сўзларига кўра, аввалига ушбу бемаъни хабарга эътибор қаратмаган, бироқ бананлар савдоси ростдан ҳам тушиб кетган. Маълум бўлишича, республика аҳолисининг учдан икки қисми, жумладан, йирик шаҳарларда истиқомат қилувчи аҳоли ҳам бу каби аҳмоқона ёлғон хабарга ишонган.
«Фуқаролар хабарни текшира билмаслиги жуда хавфли, айниқса, касаллик тарқалиши эҳтимоли бор пайтда. Фуқароларнинг ҳар қандай касалликка қарши қуроли бу — битим ва танқидий фикрлай билиши», — дейди тадбиркор.
Зафар Ҳошимовнинг сўзларига кўра, коронавирус хавфи АҚШ Федерал захира тизими ўз ставкаларини 1,75 фоиздан 1,25 фоизга туширганидан сўнг очиқ-ойдин маълум бўлган.
«Бизнес билан узоқ йиллардан бери шуғулланиш ва бозорни кузатиб юришимдан англаган нарсам шуки, бозор ҳар доим биздан яхшироқ билади ва маълумот пулга таъсир кўрсата бошласа, буни жуда жиддий қабул қилиш керак», — деб ёзади «Korzinka.uz» раҳбари.
Шунингдек, Зафар Ҳошимов ҳар бир киши ушбу касаллик узоқда эмас, балки жуда аниқ ва равшан таҳдид эканлигини англаши лозимлигини таъкидлаб, шахсий гигиенага риоя қилиш бўйича маслаҳатлар берган.
Мавзуга доир:
Изоҳ (0)