Коронавирус хавфи туфайли Қозоғистонда мактаб ўқувчилари муддатидан аввал таътилга чиқадиган бўлди. Tengrinews’нинг хабар беришича, бу ҳақда бош вазири ўринбосари Эрали Тугжанов маълум қилган.
Қайд этилишича, дунёда кенг авж олаётган коронавируснинг пандемия деб эълон қилингани сабабли шундай қарорга келинган. Қарорга кўра мактаб ўқувчилари 16 мартдан таътилга чиқади ва у 5 апрелгача давом этади. Олий таълим муассасалари эса 16 мартдан бошлаб масофавий ўқишга ўтади.
Шунингдек, 13 мартдан бошлаб мамлакатда юқумли касалликларнинг олдини олиш мақсадида оммавий тадбирларни — байрам, спорт, кўнгилочар ва маданий тадбирлар, конференциялар, семинарлар, кўргазмалар ҳамда бошқа тадбирларни ўтказиш тақиқланди.
UNESCO томонидан эълон қилинган маълумотларга кўра, ҳозирги вақтда коронавирус туфайли кузатилаётган инқироз бутун дунёда 363 миллион ўқувчи ва талабани қамраб олган. Бунда 57,8 миллион нафар талаба, қолгани эса мактаб ёшигача бўлган ҳамда мактаб ўқувчилари таълим олишдан узилиб қолган. Шу тарзда коронавирус сабабли жаҳонда ҳар бешинчи ўқувчи мактабга, ҳар тўртинчи талаба олий ўқув юртига бора олмаяпти.
Сўнгги маълумотларга кўра, дунё бўйлаб коронавирус билан касалланганлар сони 117 минг кишидан ошиб кетган. Даволанишга муваффақ бўлганлар 63 578 кишини ташкил этмоқда.
Изоҳ (0)