Жанубий Кореяда сўнгги бир сутка ичида коронавирус инфекциясини юқтириб олиш билан боғлиқ 114 та янги ҳолат қайд этилди. Март ойидан буён касалланганларнинг умумий сони 7869 кишига, қурбонлар сони эса 66 кишига етди, деб ёзмоқда «РБК». Бу ҳақда Жанубий Корея Соғлиқни сақлаш вазирлиги ҳузуридаги Касалликлар назорати ва профилактикаси марказлари ташкилоти (KCDC) маълум қилган.
Аввалроқ қурбонлар сони 60 кишига етгани ҳақида хабар берилган эди. Жанубий Корея ҳукумати эпидемиологик хавф даражасини энг юқори кўрсаткичгача оширган. Барча мактаб ва мактабгача таълим муассасаларида ўқув машғулотларининг бошланиши 23 мартгача бекор қилинган.
KCDC маълумотларига кўра, 45 нафар бемор соғайиб, уйига жавоб берилган (жами соғайганлар сони 333 кишига етган). Яна 17 727 кишининг таҳлиллари ҳали ўрганилмоқда.
Коронавирусни юқтириб олганларнинг 212 нафари Сеул, 5867 нафари Тэгу, 1145 нафари Кёнсан-Пукто провинцияси, яна 178 нафари эса Кёнгидода. Пусанда 99 та ҳолат қайд этилган. Таъкидланишича, Жанубий Кореядаги коронавирус беморларининг қарийб 4,7 минг нафари Синчонжи сектасига алоқадор одамлардир.
Сўнгги маълумотларга кўра, дунё бўйлаб коронавирус билан касалланганлар сони 117 минг кишидан ошиб кетган. Даволанишга муваффақ бўлганлар 63 578 кишини ташкил этмоқда..
Аввалроқ ЖССТ коронавируснинг пандемия даражасига етганини маълум қилганди.
Изоҳ (0)