Кувайт ҳукумати янги турдаги коронавируснинг тарқалиш хавфи муносабати билан вазирлик ва давлат ташкилотлари фаолиятини 12—26 март оралиғида тўхтатиб туришга қарор қилди. Бу ҳақда мамлакат вазирлар маҳкамаси вакили Ториқ ал-Музрамнинг сўзларига асосланиб, «РБК» хабар берди.
Ҳукумат баёнотидан сўнг мамлакат банклар ассоциацияси ҳам кўрсатилган муддатда банклар ҳам ишламаслигини маълум қилди.
Ҳар бир провинцияда банкларнинг биттадан филиаллари ишлаб туради.
Шу билан бирга, фуқаролар электрон хизматлардан, шу жумладан онлайн пул ва халқаро пул ўтказмаларидан фойдаланишлари мумкин, одамлари пул олиши мумкин бўлиши учун банкоматлар нақд пул билан тўлдирилади.
Кувайт фонд биржаси ҳам 12 мартдан ишини тўхтатган. Унинг қачон иш бошлаши номаълум.
Бундан ташқари, Кувайт ҳукумати 13 мартдан тижорий авиарейсларни ҳам чеклашга қарор қилди. Энди Кувайт халқаро аэропортига фақат мамлакат фуқаролари ва уларнинг яқинларигина учиб келиши мумкин. Юк ташувчи авиарейслар штат бўйича давом этади.
ЖССТ маълумотларига кўра, Кувайтда 69 киши коронавирусни юқтирган, касаллик қурбонлари ҳақида маълумот берилмаган.
Изоҳ (0)