АҚШда янги турдаги COVID-19 коронавирусининг тарқалиши сабаб Европа мамлакатларидан келувчилар учун 30 кунга вақтинчалик тақиқ ўрнатилди. Тақиқ Буюк Британия учун истисно қилинади. Бу ҳақда АҚШ президенти Дональд Трампга таяниб, CNN хабар берди.
«Янги тартиб-қоидалар 13 март куни ярим тундан кучга киради», — дейди Трамп.
Америка етакчисининг сўзларига кўра, шунингдек, коронавирусни аниқлаш учун керакли тестларни топширган АҚШ фуқаролари учун ҳам истисно тааллуқли.
Трампнинг таъкидлашича, мазкур тақиқ Европа иттифоқи инфекция тарқалишининг олдини олиш учун Қўшма Штатлар жорий этган «хавфсизлик чораларини кўра олмагани»га боғлиқ.
АҚШ президентининг қўшимча қилишича, ҳукумат коронавирусдан зарар кўрган компанияларга молиявий ёрдам кўрсатади. Унинг сўзларига кўра, корхоналарга кам фоизли заёмлар тақдим этилади, бу эса «вирус оқибатида юзага келган иқтисодий қийинчиликларни енгиб ўтишга» ёрдам беради.
Бундан ташқари, Трамп яқин вақтлар ичида инфекцияга чалинган, карантин ҳолатида бўлган ёки бошқа беморларга ғамхўрлик қилаётган фуқароларга молиявий имтиёзлар бериш учун «мисли кўрилмаган» чораларини кўришга ваъда берди.
12 март куни АҚШ пойтахти Вашингтонда коронавирус сабаб фавқулодда ҳолат режими эълон қилинди. Ушбу режим 15 кун амалда бўлади. Бу карантин белгилаш, нархларни оширишга уринган чайқовчиларни жазолаш ҳуқуқини беради.
Мавзуга доир:
Изоҳ (0)