Германия аҳолисининг тахминан 70 фоизи коронавирус юқтириб олиши мумкин. Бу ҳақда канцлер Ангела Меркель маълум қилди, деб ёзмоқда «РБК».
«Вирус Европада, у мавжуд ва биз буни англаб етишимиз керак», — деб таъкидлаган Германия канцлери коронавирус бўйича ўтказилган матбуот анжуманида.
Унинг сўзларига кўра, Германия аҳолининг 60-70 фоизи вирус билан зарарланиши мумкин, чунки ҳозирча коронавирусга қарши дори мавжуд эмас, одамларда эса иммунитет юзага келмаган.
Меркелнинг қўшимча қилишича, Германия ҳукумати биринчи навбатда кексалар ва касалманд кишиларни ҳимоя қилиш учун барча чораларни кўради. Айнан ана шу қатлам кўпроқ вирусга чалинишга мойил.
Германия ҳукумати 12 март, пайшанба куни, вирусга қарши кураш бўйича давлат даражасидаги чора-тадбирларни муҳокама қилади. Меркелнинг қайд этишича, Германия бюджет қўмитаси коронавирусга қарши кураш учун 1,1 миллиард доллар ажратишни ваъда қилган.
ЖССТнинг сўнгги маълумотларига кўра, Германияда коронавирусдан икки киши вафот этган, яна 1296 кишида касаллик аниқланган. Ташкилот коронавируснинг пандемия даражасига етганини маълум қилди.
Аввалроқ коронавирусга қарши кураш учун Жаҳон банки 12 миллиард доллар, Европа Иттифоқи 232 миллион евро, АҚШ Хитой ва коронавирус қайд этилган мамлакатларга 100 миллион доллар ажратиши маълум бўлган эди. Goldman Sachs Евроиттифоқ банкларининг коронавирус сабаб 30 миллиард евро йўқотишини тахмин қилди.
Ўзбекистонда коронавирус тарқалган давлатлардан келган фуқароларни карантинга олиш ҳақида қарорга кўра, Германиядан тўғридан-тўғри ёки бошқа давлатлар орқали, уюшмаган ҳолда кириб келган фуқаролар, агар охирги ташрифидан 14 кундан кам вақт ўтган бўлса, уй шароитида изоляция (уй карантинига)га олинади. Бу фуқаролар 14 сутка давомида яшаш жойи (уй, меҳмонхона, ётоқхона ва бошқа)да доимий равишда изоляцияда бўлиши лозим, оила аъзоларидан ташқари кишилар билан мулоқотда бўлмасликлари, аҳолининг оммавий тўпланадиган жойларига боришига рухсат этилмайди.
Изоҳ (0)