Germaniya aholisining taxminan 70 foizi koronavirus yuqtirib olishi mumkin. Bu haqda kansler Angela Merkel ma’lum qildi, deb yozmoqda “RBK”.
“Virus Yevropada, u mavjud va biz buni anglab yetishimiz kerak”, — deb ta’kidlagan Germaniya kansleri koronavirus bo‘yicha o‘tkazilgan matbuot anjumanida.
Uning so‘zlariga ko‘ra, Germaniya aholining 60-70 foizi virus bilan zararlanishi mumkin, chunki hozircha koronavirusga qarshi dori mavjud emas, odamlarda esa immunitet yuzaga kelmagan.
Merkelning qo‘shimcha qilishicha, Germaniya hukumati birinchi navbatda keksalar va kasalmand kishilarni himoya qilish uchun barcha choralarni ko‘radi. Aynan ana shu qatlam ko‘proq virusga chalinishga moyil.
Germaniya hukumati 12-mart, payshanba kuni, virusga qarshi kurash bo‘yicha davlat darajasidagi chora-tadbirlarni muhokama qiladi. Merkelning qayd etishicha, Germaniya budjet qo‘mitasi koronavirusga qarshi kurash uchun 1,1 milliard dollar ajratishni va’da qilgan.
JSSTning so‘nggi ma’lumotlariga ko‘ra, Germaniyada koronavirusdan ikki kishi vafot etgan, yana 1296 kishida kasallik aniqlangan. Tashkilot koronavirusning pandemiya darajasiga yetganini ma’lum qildi.
Avvalroq koronavirusga qarshi kurash uchun Jahon banki 12 milliard dollar, Yevropa Ittifoqi 232 million yevro, AQSh Xitoy va koronavirus qayd etilgan mamlakatlarga 100 million dollar ajratishi ma’lum bo‘lgan edi. Goldman Sachs Yevroittifoq banklarining koronavirus sabab 30 milliard yevro yo‘qotishini taxmin qildi.
O‘zbekistonda koronavirus tarqalgan davlatlardan kelgan fuqarolarni karantinga olish haqida qarorga ko‘ra, Germaniyadan to‘g‘ridan to‘g‘ri yoki boshqa davlatlar orqali, uyushmagan holda kirib kelgan fuqarolar, agar oxirgi tashrifidan 14 kundan kam vaqt o‘tgan bo‘lsa, uy sharoitida izolyatsiya (uy karantiniga)ga olinadi. Bu fuqarolar 14 sutka davomida yashash joyi (uy, mehmonxona, yotoqxona va boshqa)da doimiy ravishda izolyatsiyada bo‘lishi lozim, oila a’zolaridan tashqari kishilar bilan muloqotda bo‘lmasliklari, aholining ommaviy to‘planadigan joylariga borishiga ruxsat etilmaydi.
Izoh (0)