Украина пойтахти Киев шаҳрида коронавирусга қарши чоралар ва чекловлар режаси тасдиқланди. Бу ҳақда «РБК Украина» хабар берди.
Маълум қилинишича, Киевда 12 мартдан бошлаб коронавирус бўйича карантин жорий этилади. Шу сабабли оммавий тадбирлар тақиқланади ва мактаблар ёпилади.
Киев мэри Виталий Кличконинг таъкидлашича, шаҳарда коронавирус бўйича бирорта ҳам ҳолат қайд этилмаган.
«Коронавируснинг эҳтимолий тарқалишининг олдини олиш учун пойтахт ҳокимияти эпидемияга қарши чоралар ва чекловлар режасини тасдиқлади. Киевда коронавирус билан боғлиқ ҳолатлар ҳали қайд этилмаган бўлса ҳам, биз кутмасликка ва шаҳар аҳолисини ҳимоя қилишга қарор қилдик. 12 мартдан бошлаб Киевда профилактика чораларини жорий қиламиз», — деди Кличко.
Хусусан, умумий ва олий таълим муассасаларида, болалар боғчаларида, санъат, спорт мактабларида ўқув жараёни вақтинча чекланади.
Шунингдек, Киевда оммавий тадбирлар ўтказиш чекланади. Бу концертлар, конференциялар, фильм намойишлари ва бошқа тадбирларга ҳам тегишли бўлади. Савдо ва кўнгилочар марказлар ёпилади.
Аввалроқ Киев расмийлари шаҳарда коронавирус қайд этилса ва у оммавий тус олса, мактаблар ва метро ёпилиши мумкинлигини айтган.
Айни пайтда Украинада коронавирус билан касалланиш бўйича битта ҳолат расман тасдиқланган. 2020 йилнинг 3 март куни Италияга сафар қилган эркакда вирус аниқланди. 10 март ҳолатига кўра, унинг аҳволи барқарор.
Сўнгги маълумотларга кўра, Хитойнинг коронавирус тарқалиш марказида карантин қисман енгиллаштирилди. Грузияда биринчи бор ўсмир йигитда коронавирус аниқланди. Туркияда ҳам коронавирус билан касалланиш бўйича дастлабки ҳолат қайд этилди. Google эса ўз ходимларига уйдан ишлашни тавсия қилди. Нью-Йоркда ўтказилиши керак бўлган халқаро автошоу коронавирус сабаб август ойига қолдирилди. Америкада коронавирус бўйича бизнес-конференция коронавирус сабабли қолдирилди.
Изоҳ (0)