Қозоғистон миллий банки жаҳон нефть бозоридаги инқирозлар туфайли молиявий тизим барқарорлиги учун хавф-хатарларнинг ўсиб бораётгани ортидан базавий ставкасини фоиз пунктида +/- 1,5 фоиз йўлаги билан 9,25 фоиздан 12 фоизгача оширишга қарор қилди. Бу ҳақда «РИА Новости» хабар берди.
9 март куни ҳукумат ва миллий банк ҳамкорликдаги мурожаатида глобал бозорлардаги вазиятнинг салбий оқибатларини камайтириш ва республиканинг ижтимоий-иқтисодий ривожланишининг барқарорлигини таъминлаш учун зарур ресурсларга эга эканлигини айтган эди.
Миллий банк, зарур бўлса, инфляция тезлашишини чеклаш ва тенге курсининг ҳаддан ташқари ўзгарувчанлигининг олдини олиш учун базавий ставкасини оширишга ва валюта интервенциясини ўтказишга тайёрлигини билдирди.
Миллий банк раҳбари Ёрболат Досаев «Базавий ставканинг ошиши макроиқтисодий ва молиявий барқарорликни сақлаш, ташқи бозорларнинг ички нархларга ва долларизация даражасига салбий таъсирининг олдини олиш учун шароит яратади», —дея таъкидлади.
Унинг сўзларига кўра, миллий банк тенге алмашинув курсининг эркин сузувчи режимига содиқлигини тасдиқлайди.
«Шунга қарамай, ўзгарувчан шароитларда молиявий тизимнинг барқарорлигини таъминлаш учун валюта интервенцияси амалга оширилиши эҳтимолдан холи эмас», дея қўшимча қилди у.
Қозоғистон миллий банки жаҳон иқтисодиётида ва халқаро бозорларда вазиятнинг ривожланишини яқиндан кузатиб боради ва агар керак бўлса, мамлакатнинг молиявий бозорида барқарорликни таъминлаш учун қўшимча чоралар кўришга тайёр, дейилади хабарда.
Эслатиб ўтамиз, 9 март куни жаҳонда нефть нархининг пасайиши тезлашиб кетгани қайд этилди, хусусан, очиқ савдоларда Brent маркасидаги нефть нархи 20 фоизгача тушди. Дунёдаги нефть нархининг тушиши оқибатларига қарши курашиш учун Қозоғистонда махсус штаб тузилди.
Изоҳ (0)