Хитойнинг Фуцзян провинциясидаги Сюанчжоу шаҳрида меҳмонхона қулаши оқибатида ҳалок бўлганлар сони 18 кишига етди, яна 12 киши бедарак йўқолган деб топилмоқда. Бу ҳақда People’s Daily газетасига таяниб, «РБК» хабар бермоқда.
10 март куни эрталаб қутқарувчилар қулаган меҳмонхона вайроналари остидан 59 кишини олиб чиққан. Уларнинг 16 нафарида ҳаёт аломатлари аниқланмаган. Шунингдек, яна икки киши шифохонада вафот этган.
Эслатиб ўтамиз, 7 қаватли меҳмонхона 7 март куни қулаган эди. Эртаси куни вайроналар остидан 50 киши чиқариб олинган. Расмий маълумотларга кўра, вайроналар остида 70 киши бор. 80 ўринга мўлжалланган ушбу меҳмонхона 2018 йилда очилган бўлиб, COVID-19 коронавирус инфекцияси эпидемияси сабаб 2020 йилда карантин марказига айлантирилган эди.
Ҳозирча бинонинг қулаши сабаблари ҳақида расмий маълумот берилмаган.
Эслатиб ўтамиз, коронавирус инфекциясининг тарқалиши дастлаб 2019 йилнинг декабрида Хитойнинг Ухань шаҳрида аниқланган эди. Кейинчалик касалланиш ҳолатлари Япония, Жанубий Корея, Австралия, Канада, Германия, Франция, Испания, Италия, Буюк Британия, Швеция, Россия, Канада, Тайван, Филиппин, Сингапур, Малайзия, Непал ва бошқа бир қатор давлатларда аниқланди.
Жаҳон соғлиқни сақлаш ташкилотининг маълумотларига кўра, эпидемия бошланганидан буён Хитойда 80 754 киши касалликка чалинган бўлиб, уларнинг 3136 нафари вафот этган. 59 897 нафар бемор даволанишга муаваффақ бўлган.
Дунё бўйлаб 112 427 киши коронавирус билан касалланган. Даволанишга муваффақ бўлганлар сони эса 63 578 кишини ташкил этмоқда. Хитойдан ташқарида касаллик қурбонлари энг кўп Италия (463), Эрон (237), Жанубий Корея (51), АҚШ (24) ва Францияда (19) қайд этилган.
Хитой Соғлиқни сақлаш ишлари бўйича давлат қўмитаси коронавирус энг камида 2020 йилнинг июнь ойига қадар тарқалишда давом этишини эълон қилди. Мутахассиснинг сўзларига кўра, вирус тарқалишининг олдини олиш учун чегараларда санитар назоратни кучайтириш ҳамда эпидемия тарқалган хорижий мамлакатлардан кириб келаётганлар учун қатъий карантин сиёсатини белгилаш зарур.
Изоҳ (0)