АҚШ «Толибон» ҳаракати билан тинчлик битими доирасида ўз қўшинларини Афғонистондан олиб чиқишни бошлади. Meduza’нинг ёзишича, бу ҳақда Афғонистондаги Америка қўшинларининг расмий вакилига асосланиб, Associated Press хабар берди.
Унинг сўзларига кўра, АҚШ Афғонистондаги қўшинлари сонини яқин 4,5 ой ичида 13 000 дан 8 600 га камайтиради. Америка қўшинларининг мамлакатдан тўлиқ чиқарилиши 14 ой ичида якунланиши керак.
АҚШ қўшинлари ва унинг иттифоқчилари Афғонистонда 2001 йилдан бери бўлиб келмоқда. Сўнгги йилларда улар сони сезиларли даражада камайди.
Эслатиб ўтамиз, 29 февраль, шанба, куни Қатар пойтахти Доҳада АҚШнинг Афғонистон бўйича махсус вакили Залмай Ҳалилзод ҳамда «Толибон» етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар келишув битимини имзолаган эди. Унда Американинг барча қўшинларини Афғонистондан олиб чиқиш кўзда тутилган эди. «Толибон» эса ўз навбатида бошқа террорчилик гуруҳ вакилларини яширмаслик ва Афғонистон ҳукумати билан тўлиқ музокаралар олиб бориш мажбуриятини олган эди.
Ўзбекистон ташқи ишлар вазири Абдулазиз Комилов бошчилигидаги делегация ҳам ушбу тинчлик музокараларида иштирок этган. «Толибон» Ўзбекистоннинг Афғонистон можаросини ҳал этишдаги саъй-ҳаракатларини эътироф этган эди.
НБC телеканали Америка разведкасининг Покистондаги манбалари «Толибон» америкаликлар Афғонистондан чиқиб кетгунига қадар келишув шартларига риоя қилишини, шундан сўнг ҳукумат қўшинларининг позициясига ҳужум уюштиришини билдирганди.
Изоҳ (0)