Италия бош вазири Жузеппе Конте мамлакатда коронавирус тарқалиши сабаб фавқулодда чоралар кўрилиши ҳақида эълон қилди. Мамлакатда барча оммавий тадбирлар тақиқланган, мактаблар, университетлар ёпилмоқда, миллий футбол чемпионатлари тўхтатилган, деб хабар беради Corriera della Sera.
Ҳукумат қарори билан мамлакатда ҳаракатланишга ҳам чеклов ўрнатилади. Иш эҳтиёжлари, оилавий ёки соғлиқни сақлаш муаммоларини ҳал қилиш учун истисно бўлиши мумкин. Муниципалитетлар ўртасида ҳаракатланиш учун махсус ҳужжат талаб қилинади.
Бундан ташқари, аввалроқ Италия шимолидаги ҳудудларда жорий этилган эҳтиёт чоралари бутун мамлакат бўйлаб амалда бўлади. Контенинг айтишича, коронавирусга қарши туриш учун вақт қолмаган, кескин чоралар кўриш вақти келган. «Қабул қилинган қонунни ‘Мен уйда ўтираман’, дея тушунтирган бўлардим», — дейди бош вазир.
Мактаблар 3 апрелга қадар ёпилган, ресторан ва барлар соат 18:00 га қадар ишлайди. Шунингдек, футбол бўйича Италия чемпионати ҳамда бошқа спорт тадбирлари бекор қилинган.
Ҳозиргача Италияда 7985 та вирус юқтириб олиш ҳолати кузатилди. 463 киши вафот этган. Италия коронавирусдан ўлим ҳолатларининг фоиз кўрсаткичи бўйича жаҳонда биринчи ўриндаги мамлакатга айланди. Шунингдек, мамлакатнинг Пемонт вилояти ҳокими коронавирус юқтириб олгани ҳақида хабарлар пайдо бўлган.
Изоҳ (0)