АҚШ президенти Дональд Трамп билан қўл бериб кўришган Америка Консерватив иттифоқи (ACU) раҳбари Мэтт Шлапп коронавирусга чалинганлар билан мулоқотда бўлганини тан олди, деб хабар беради The Washington Post.
Фото: The Washington Post
Иттифоқ маълумотларига кўра, консерватив сиёсий ҳаракатлар анжуманида иштирок этган фуқаронинг таҳлил натижалари унда коронавирус борлигини кўрсатган. Ушбу тадбирда Дональд Трамп ҳамда вице-президент Майкл Пенс ҳам иштирок этганди. Оқ уй матбуот котиби Стефани Гришемнинг маълум қилишича, улар касалликка чалинган одамдан узоқда бўлган.
Бироқ Шлаппнинг айтишича, у мазкур тадбирда коронавирусни юқтириб олган одам билан мулоқот қилган. Анжуманнинг сўнгги кунида ACU раҳбари президент билан қўл бериб кўришган эди.
«Менимча, ваҳима қилмасдан бу ерда нима бўлаётганини кузатиш ва дўстимиз соғайиб кетишига умид қилишимиз керак», — дейди Шлапп.
Иттифоқ раҳбарининг сўзларига кўра, коронавирусга чалинган одам билан мулоқот тасодифан ва жуда қисқа муддат бўлиб ўтган.
АҚШ Касалликлар назорати ва профилактикаси марказлари маълумотларига кўра, АҚШда коронавирус юқтириб олиш билан боғлиқ 164 та ҳолат аниқланган, 11 киши вафот этган. Касалланиш ҳолатлари 19 та штатда қайд этилган. 76 киши касалланган Нью-Йорк штатида фавқулодда ҳолат эълон қилинган.
