9 март кунги очиқ савдоларда Brent маркасидаги нефть нархи 38 долларни ташкил этди. Савдоларнинг ёпилиш вақтида унинг нархи 46 долларга етган, деб хабар беради «РБК».
Brent нефтининг бир баррели 22 фоизга арзонлашиб, 35,26 долларга қадар тушиб кетган. Бу вақт WTI маркасидаги нефтнинг нархи 21 фоизга арзонлашган — 32,5 доллар. Савдолар бошланганида ушбу нефть бир баррели учун 34 доллардан таклиф қилинган. Бундан олдинги савдоларнинг ёпилиш вақтида WTI нархи 41 долларни ташкил этганди.
Brent 33,55 долларга қадар тушиб кетган. Мазкур нефтнинг нархи охирги марта 2016 йилнинг январида бу қадар арзонлашган. Нефть 1991 йилдан буён рекорд пасайишни кўрсатди, ўшанда АҚШ Форс кўрфазида Ироқ томонидан қўлга олинган Кувайтни озод этиш бўйича «Саҳродаги бўрон» операциясини бошлаган эди.
Савдолар бошланишидан бир неча дақиқа олдин Goldman Sachs тижорат банки Brent маркасидаги нефтнинг нархи яқин ҳафталар ичида бир баррели учун 20 долларга тушиб кетишини башорат қилди. Банк ўз ҳисоб-китобларида Brent’нинг ўртача нархларини 2020 йилнинг иккинчи ва учинчи чорагида кескин равишда 30 долларга қадар туширган.
«Бизнингча, ОПЕК ва Россия ўтган дам олиш кунлари нархлар урушини бошлади. Бунга Саудия Арабистони охирги 20 йил ичида ўз нефти нархини кескин равишда максимумга туширгани сабаб бўлмоқда», — дейди банк таҳлилчилари.
Эслатиб ўтамиз, 6 март куни Вена шаҳрида ОПЕК мамлакатлари ва нефть қазиб олишни қисқартириш бўйича келишувни қўллаб-қувватлаган давлатлар вакилларининг учрашуви бўлиб ўтди. ОПЕК мамлакатлари нефть қазиб олишни қўшимча равишда кунига 1,5 миллион баррелга қисқартиришни таклиф қилди. Шундан 0,5 миллион баррели Россия ва ОПЕК таркибига кирмайдиган бошқа давлатлар ҳиссасига тўғри келиши керак. Қайд этилишича, Россия нефть қазиб олишни қисқартириш ниятида эмас.
Аввалроқ коронавирус сабабли Brent ва WTI маркаларидаги нефть нархи 2011 йилдан буён кузатилган энг катта пасайишга учраган. Нефть нархи 2,5 йил ичида илк бора 49 доллардан ҳам арзонлашган.
Изоҳ (0)