Ўзбекистонда Y-хромосома орқали инсонларнинг генетик келиб чиқишини, шажарани аниқловчи янги экспертиза тури жорий этилиши режалаштирилмоқда. Бу ҳақда Республика суд экспертиза марказининг лаборатория мудири Дилобар Аҳмедова 5 март, пайшанба куни, АОКАда бўлиб ўтган матбуот анжуманида маълум қилган.
«Ўзбекистон Президентининг қарорига асосан, марказимизда пулли хизматлар сони кўпайтирилмоқда. Жумладан, Y-хромосома орқали генетик келиб чиқиш тадқиқотларини йўлга қўйиш режалаштирилган. Бу борада лабораториямизда нафақат пулли хизматлар кўрсатамиз, балки экспертиза жараёнида ҳам Y-хромосомалар орқали кўп жиноятларни очишда ёрдам берамиз.
Y-хромосома бу одатда эркак жинсидаги шахсларда ота авлоддан наслдан наслга ўтадиган генетик белги ҳисобланади ва у ота авлод бўйича ўтиб боради. Умуман, ДНК шундай моддаки, у нафақат одамнинг шахсини, қариндошлигини, балки унинг келиб чиқишини, ҳаёти давомида мавжуд бўлган касаллиги ҳақида маълумотлар олиш имкониятини берувчи модда ҳисобланади. Шу тадқиқотлар йўли орқали бизга мурожаат қилган фуқароларнинг ота авлод бўйича келиб чиқиши кимларга бориб тақалишини аниқлашимиз мумкин», — дейди Дилобар Аҳмедова.
Мутахассиснинг сўзларига кўра, бундай экспертиза тадқиқотларини ўтказиш учун буюртмачи ҳамда солиштирма намуна зарур бўлади.
«Бундай экспертиза билан кўп фуқаролар қизиққан. Ҳатто марказимизга биз амир Олимхоннинг Ўзбекистонда қолган авлодлари ҳисобланамиз, шуни экспертиза йўли билан тасдиқлаб бера оласизларми, деб мурожаат қилиб ҳам келишган. Буни аниқлаш учун ҳозирги кунда ҳаёт бўлган ва амир Олимхоннинг авлоди экани аниқ бўлган қариндошларидан намуна олишимиз ва буюртмачининг намуналари билан солиштиришимиз керак бўлади», — дейди марказ лабораторияси мудири.
Матбуот анжуманида жорий этилиши режалаштирилаётган экспертиза орқали одамларнинг этногенетик келиб чиқишини, яъни этногенез бўйича турк, араб, тожик ёки бошқа этник гуруҳга мансублигини ҳам аниқлаш мумкин бўлиши билдирилди.
Аввал Ўзбекистонда ДНК экспертизасини ўтказиш нархлари маълум қилинган. Шунингдек, 2019 йил декабрь ойида Тошкент вилоятида мурданинг шахсини аниқлаш учун ўтказилган ДНК текширувида аёлнинг эрига қилган хиёнати фош этилгани ҳақида хабар берилганди.
Изоҳ (0)