Олий ва ўрта махсус таълим вазирлиги мутасаддилари 6 март, жума куни, бўлиб ўтган матбуот анжуманида Олий таълим тизимини ривожлантириш концепцияси ҳамда 2020 йил учун тасдиқланган Давлат дастурида белгилаб берилган вазифалар ижроси бўйича режалар билан ўртоқлашди. Бу ҳақда «Gazeta.uz» хабар берган.
Тадбирда вазирлик бош бошқармаси бошлиғи Абдували Холиқов, бошқарма бошлиқлари Мақсуд Ҳамроев ва Алишер Абдуллаев, шунингдек, вазирлик матбуот хизмати раҳбари Фарҳод Бабашев иштирок этди.
Абдували Холиқовнинг сўзларига кўра, бугунги кунда мамлакатда 117 та ОТМ фаолият олиб бормоқда. Янги олий таълим муассасаларини очиш ва ёшларни олий таълимда ўқишни давом эттиришга жалб қилиш ишлари амалга оширилмоқда. 2017 йилда олий таълимга ўрта таълимдан ўқувчиларни қамраб олиш 9 фоизни ташкил қилган бўлса, бугун ушбу рақам 20 фоизга етган. Келаси йили ушбу кўрсаткични 25 фоизга етказиш кўзда тутилаётгани айтилди.
Магистратурага қабул қилинадиган талабалар сони ҳам қарий икки бараварга ўсиб — 5000 дан 11,5 минг нафарга етган. 2019/2020-ўқув йилида профессор ва ўқитувчилардан иборат ОТМлар таркибига магистратура битирувчиларининг 6 фоиз қисми қўшилган.
Матбуот анжуманида хориж ОТМлари филиаллари сони ҳам йилдан йилга кўпайиб бораётгани қайд этилди. Айни вақтда Ўзбекистонда 21 та хориж ОТМ филиали, жумладан, Германия, Италия, Франция, Россия, Япония ва Малайзия каби давлатларнинг институт ва университетларининг филиаллари нафақат пойтахт, балки вилоятларда ҳам очилган. 2020 йилда хориж ОТМ филиаллари сони яна 10 тага кўпаяди.
Кетма-кет уч йилдан буён соғлиқни сақлаш ҳамда педагогика соҳаларида кадрлар буюртма асосида қабул қилинмоқда. Ушбу чора-тадбирлар самараси ўлароқ Навоий вилоятида ёшларнинг олий таълимга қамрови даражаси 31 фоизга етиб, ҳудуд Тошкент шаҳридан (31,5 фоиз) кейин 2-ўринга кўтарилди.
Тошкент, Бухоро, Навоий, Сирдарё, Жиззах ҳамда Қорақалпоғистон Респуликаси ўрта таълим муассасалари битирувчиларининг ОТМларга кириш кўрсаткичи борасида етакчилик қилмоқда: 20 фоиз ва ундан юқори. Наманган, Сурхондарё ва Андижонда 15 фоиздан камроқ.
Вазирлик вакилларининг қайд этишича, қабул квоталарининг ўсиши 2023 йилда бинолар билан боғлиқ муаммоларни юзага келтириши мумкин, шу сабабли ушбу муаммони ҳал этиш учун инвестиция маблағларини жалб қилиш масаласи кўриб чиқилмоқда.
2020/2021-ўқув йилида 25 та ОТМ кредит-модул тизимига ўтказилади. ОТМлар танловида ушбу тизимга уларнинг тайёргалик даражаси ва профессор ҳамда ўқитувчилардан иборат жамоанинг таркиби ҳисобга олинади.
Кредит-модул тизимига ўтилгач, ҳафтасига 24 соатни ташкил этувчи талабанинг аудитор юкламаси қисқаради. Вазирлик вакили ўқув ҳафтасининг 6 кун давом этиши мажбурий норма эмаслигини ҳам эслатиб, ОТМлар имкониятидан келиб чиқиб, уни қисқартириши мумкинлигини таъкидлади.
Кредит-модул тизими ўқитувчидан, ҳам талабадан ҳам масъулиятли бўлишни талаб қилади. Аввал умумий талабалар сонининг 0,3-0,4 фоиз қисми иккинчи йилда ҳам таълимни давом эттиришга қолган бўлса, ҳозирда ушбу рақам 2 фоизни ташкил қилади ва кредит-модул тизимига ўтилса, яна ўсишда давом этиши мумкин. Талабаларда олийгоҳга кирган талаба албатта уни тамомлайди, деган тушунча бўлмаслиги, акс ҳолда иш берувчининг битирувчига бўлган муносабати ўзгаришига сабаб бўлади. ОТМлар асосий эътиборни муаммоли вазиятларда мустақил равишда тўғри ечим топа оладиган ҳар томонлама билимли кадрларни етиштиришга қаратиши лозим.
Олий таълим тизимида коррупция ҳолатларининг олдини олиш мақсадида «Электрон университет» тизими ишга туширилади — бу баҳолашда инсон омилининг иштирокини камайтириб, қоғоздаги рейтинг дафтарчалари ва журналларнинг кейинчалик йўқ бўлишига замин ҳозирлайди. Бундан ташқари ОТМларда ишлаб чиқариш ходимларининг сони қисқариб, тежаб қолинган маблағлар муассасани ривожлантиришга сарфланади. Тизим март апрель ойларида синовдан ўтказилади ва янги ўқув йилидан барча институт ҳамда университетларда ишга туширилиши мумкин.
Изоҳ (0)