Ўзбекистоннинг Теҳрон шаҳридаги Элчихонаси 7 март, шанба куни COVID-19 коронавируси тарқалишининг олдини олиш мақсадида Туркманистон ва Эрон ўртасидаги чегара ёпилиши сабабли 700 га яқин ҳайдовчи, жумладан, 11 нафар Ўзбекистон фуқароси «Лутфобод» ва «Сарахс» чегара назорат-ўтказиш пунктларида қолиб кетгани тўғрисида интернетда тарқалган маълумотни тасдиқлади.
Элчихонанинг консуллик бўлими 23 февралдан буён мазкур фуқаролар билан доимий алоқада бўлиб келмоқда. Улар транспорт воситаларини божхона постларида қолдириб ватанга қайтишни рад этди.
«Ўзбекистоннинг Теҳрон ва Ашхобод шаҳарларидаги элчихоналари вазиятни назоратга олган ҳамда ушбу масалани ҳал қилиш учун Эрон ва Туркманистоннинг тегишли органлари билан доимий мулоқот олиб бормоқда», — дейилади ТИВ Консуллик-ҳуқуқий департаменти ахборотида.
Эрон—Туркманистон чегарасида қолиб кетган 11 ўзбекистонликнинг Шавкат Мирзиёевга ёрдам сўраб, видеомурожаат йўллагани ҳақида хабар берилганди.
Эрон—Туркманистон чегараси январь ойида ёпилган, ушбу воқеадан сўнг Туркманистонда Эрондан кириб келадиган Coca-Cola ва тамаки маҳсулотлари йўқолиб қолганди.
Изоҳ (0)