Италия коронавирусдан ўлим ҳолатларининг фоиз кўрсаткичи бўйича жаҳонда биринчи ўриндаги мамлакатга айланди

Италияда янги турдаги коронавирусни юқтириб олган ҳар 20-бемор вафот этмоқда, дея хабар бермоқда «РБК».

8 март, якшанба куни Италияда коронавирус оқибатида вафот этганлар сони 366 кишига етди, бу мамлакатда коронавирусга чалинган 7,3 минг кишининг 4,96 фоизини ташкил этади. Ўлим ҳолатларининг фоиз кўрсаткичи бўйича иккинчи ўринда АҚШ турибди — у ерда 472 кишида коронавирус аниқланган, уларнинг 19 нафари (4,03 фоизи) вафот этган.

Хитой учинчи ўринда (3,83 фоиз), Эрон эса тўртинчи поғонани банд этган (2,96 фоиз). «РИА Новости» агентлигининг қайд этишича, энг кам ўлим ҳолатлари Жанубий Кореяда — у ерда коронавирусни юқтириб олганларнинг фақат 0,68 фоизи вафот этмоқда.

Айни вақтда, коронавирусга чалинганлар сонининг фоиз кўрсаткичи бўйича Жанубий Корея дунё биринчи бўлиб турибди — у ерда ҳар 1 миллион аҳолига 142,1 нафар тасдиқланган бемор тўғри келмоқда. Иккинчи ўринда — Италия (121,9 бемор), учинчи ўринда— Эрон (80,9 бемор), тўртинчи ўринда эса Хитой (58,3 бемор).

Куни кеча Италия бош вазири Жузеппе Конте коронавирус инфекцияси тарқалиши муносабати билан мамлакатнинг 14 та провинциясида кириш-чиқишни ёпган эди. 3 апрелга қадар ёпилган ҳудудлар орасида Ломбардия, Римини, Модена, Новара ва бошқалар бор. Бундан ташқари, 14 та провинцияда мактаблар, музейлар, спорт заллари ёпилган, диний маросимлар тўхтатилган.