Янги турдаги коронавирус эпидемияси сабаб жаҳон иқтисодиёти 2,7 триллион долларгача зарар кўриши мумкин, дея огоҳлантирди Bloomberg экспертлари. Агентликнинг қайд этишича, бу Буюк Британия ялпи ички маҳсулоти (ЯИМ)га тенг кўрсаткич. Экспертлар ўз тадқиқотида касаллик билан боғлиқ вазиятнинг тўрт хил ривожини кўриб чиққан.
Базавий, энг позитив сценарийга кўра, Хитой касаллик тарқалиши билан боғлиқ вазиятни зудлик билан ўз назоратига олиб, иккинчи чоракда унинг оқибатларини бартараф этиб, ўзига келиб олиши керак, шунда жаҳон иқтисодиётидаги вазият осойиштароқ бўлади.
Воқеалар ривожининг иккинчи вариантига кўра, Хитой коронавирус муаммосини тез ҳал қилолмайди. Бундан ташқари, Хитойдан ташқарида (Жанубий Корея, Италия) ҳам касаллик ўчоқлари пайдо бўлгани, касалликнинг Япония, Франция ва Германияда ҳам тарқалаётгани, катта эҳтимол билан, бу давлатлар иқтисодиётига зарар келтиради. Экспертларнинг ҳисоб-китобига кўра, бу сценарийда 2020 йилги иқтисодий ўсиш кўрсаткичлари 2,3 фоизгача камаяди.
Агар касаллик аниқланган барча мамлакатларда, жумладан, АҚШ, Ҳиндистон, Буюк Британия, Канада ва Бразилияда коронавируснинг оммавий ўчоқлари пайдо бўлса, бу ҳолда жаҳоннинг барча ўнта энг йирик иқтисодиётида ўсиш секинлашади, чунки уларнинг бари вирус тарқалишига қарши куч ташлайди. Бу сценарий бўйича глобал иқтисодий ўсиш суръати 2020 йилда 1,2 фоизгача тушиб кетади, Еврозона ва Японияда рецессия кузатилади, Америка иқтисодиётининг ўсиши эса 0,5 фоизгача қисқаради.
Экспертларнинг тўртинчи сценарийси — воқеаларнинг энг ёмон ривожи. Глобал пандемия ҳолатида — вирус жаҳондаги барча мамлакатларни қамраб олгач, дунё иқтисодиёти 2,7 триллион долларгача йўқотиши мумкин, йиллик ўсиш суръати эса 0 га тенг бўлади.
Ўз навбатида, Bank of America таҳлилчилари 2020 йил жаҳон иқтисодиёти учун 2009 йилги глобал иқтисодий инқироздан кейинги энг ёмон йил бўлиши ҳақида огоҳлантирмоқда. Уларнинг прогнозига кўра, Хитой иқтисодиётининг сустлашуви оқибатида жаҳон иқтисодиёти ўсиши суръати йил якунлари бўйича 2,8 фоизгача пасаяди.
Изоҳ (0)