2020 йил 6 март куни Ўзбекистоннинг Токиодаги элчихонаси ўзининг расмий веб-сайти, Facebook ижтимоий тармоғидаги саҳифаси ва Telegram мессенжеридаги канали орқали Япониядаги ўзбекистонликларга мурожаат йўллади, деб хабар беради Ташқи ишлар вазирлиги.
«Ҳозирги кунда Япония ҳудудида коронавирус инфекциясига чалинган беморлар сони ошиб, касаллик тарқаган префектуралар кўпайиб бораётгани ҳаммамизни хавотирга солмасдан иложи йўқ. Ушбу касаллик тарқалиши билан курашиш мақсадида Япония ҳукумати аниқ чора-тадбирларни амалга оширмоқда. Яқин келажакда вирус тарқалишининг камайишига ва унинг хавфи кескин сусайишига умид қилиб қоламиз», – дейилади мурожаатда.
Бундай шароитда Ўзбекистон ҳукумати ҳам мамлакат аҳолиси соғлиғини сақлаш, коронавируснинг республикага кириб келишини олдини олиш мақсадида бир қатор чоралар кўрмоқда.
Хусусан, жорий йилнинг март ойидан Тошкент—Токио—Тошкент йўналиши бўйича авиақатновлар бошланиши режалаштирилган эди. Аммо вирус тарқалиши шароитида ва эҳтиёт чора сифатида мазкур авиақатнов вақтинчалик бекор қилинди.
Бундан ташқари, жорий йилнинг 1 мартидан бошлаб Ўзбекистонга Япониядан тўғридан-тўғри ёки бошқа давлатлар орқали фуқаролар бир вақтда уюшган ҳолда кириб келганда, улар эпидемияга қарши кураш фавқулодда комиссияси қарорига мувофиқ белгиланган муассасаларда 14 кунлик карантинга жойлаштириб, тиббий назорат, ташхис ва даволаш ишлари ўтказилади.
«Ушбу чоралар мамлакат хавфсизлигини ва халқимиз сиҳат-саломатлигини таъминлашга хизмат қилишига ишонамиз. Сизлар ва яқинларингиздан агар бу чоралар айрим ноқулайликлар туғдираётган бўлса, ушбу ҳолатни тўғри тушунишингизни ва қўллаб-қувватлашингизни сўраб қоламиз.
Ўз навбатида олдинги мурожаатномаларимизда қайд этганимиздек, барчангиздан керакли эҳтиёт чораларини кўришингизни, хусусан, барча санитария-гигиеник талабларга риоя қилишингизни, одамлар кўп тўпланадиган жамоат жойларида махсус ниқоблардан фойдаланишингизни, гўшт маҳсулотларини истеъмол қилишда унинг яхши пишганлигига эътибор қаратишингизни, махсус гигиеник дезинфекция ва тозалаш воситаларидан фойдаланиб юришингизни сўраймиз», — дейилади хабарда.
Касаллик аломатларини (ҳароратнинг ошиши, йўтал, ҳолсизланиш ва ҳоказолар) сезган фуқаролардан дарҳол махсус тиббиёт муассасаларига мурожаат қилиш сўралади.
Элчихона консуллик бўлимининг +8170-1273-4900 телефон рақами ҳар куни 24 соат мобайнида мурожаатларни қабул қилишга тайёр. Авиақатновлар масалалари бўйича +8170-1431-0026 рақамига қўнғироқ қилиш мумкин.
Бундан ташқари, касаллик аломатларини сезган фуқаролардан дарҳол +8150-3816-2787 рақамига хабар бериш ва уларнинг кўрсатмаларига амал қилишингизни сўралмоқда.
«Кузатилаётган шароитда элчихона ҳамма ватандошларимизга имкон қадар ёрдам беришга тайёр эканлигини билдиради. Хусусан, ҳозирги кунда ҳимоя ниқоблари етишмовчилигини инобатга олиб, элчихона чекланган миқдорда бўлса ҳам ниқоблар захирасига эга эканлигини ва эҳтиёж сезаётган ватандошларимиз элчихонадан ниқобни бепул олиши мумкинлигини билдирмоқчимиз», — дейилган мурожаатда.
Мавзуга доир: Тошкентга учиб келган Жанубий Кореядаги ўзбекистонликлар 14 кунлик карантинга жойлаштирилади
Изоҳ (0)