2020-yil 6-mart kuni O‘zbekistonning Tokiodagi elchixonasi o‘zining rasmiy veb-sayti, Facebook ijtimoiy tarmog‘idagi sahifasi va Telegram messenjeridagi kanali orqali Yaponiyadagi o‘zbekistonliklarga murojaat yo‘lladi, deb xabar beradi Tashqi ishlar vazirligi.
“Hozirgi kunda Yaponiya hududida koronavirus infeksiyasiga chalingan bemorlar soni oshib, kasallik tarqagan prefekturalar ko‘payib borayotgani hammamizni xavotirga solmasdan iloji yo‘q. Ushbu kasallik tarqalishi bilan kurashish maqsadida Yaponiya hukumati aniq chora-tadbirlarni amalga oshirmoqda. Yaqin kelajakda virus tarqalishining kamayishiga va uning xavfi keskin susayishiga umid qilib qolamiz”, – deyiladi murojaatda.
Bunday sharoitda O‘zbekiston hukumati ham mamlakat aholisi sog‘lig‘ini saqlash, koronavirusning respublikaga kirib kelishini oldini olish maqsadida bir qator choralar ko‘rmoqda.
Xususan, joriy yilning mart oyidan Toshkent—Tokio—Toshkent yo‘nalishi bo‘yicha aviaqatnovlar boshlanishi rejalashtirilgan edi. Ammo virus tarqalishi sharoitida va ehtiyot chora sifatida mazkur aviaqatnov vaqtinchalik bekor qilindi.
Bundan tashqari, joriy yilning 1-martidan boshlab O‘zbekistonga Yaponiyadan to‘g‘ridan to‘g‘ri yoki boshqa davlatlar orqali fuqarolar bir vaqtda uyushgan holda kirib kelganda, ular epidemiyaga qarshi kurash favqulodda komissiyasi qaroriga muvofiq belgilangan muassasalarda 14 kunlik karantinga joylashtirib, tibbiy nazorat, tashxis va davolash ishlari o‘tkaziladi.
“Ushbu choralar mamlakat xavfsizligini va xalqimiz sihat-salomatligini ta’minlashga xizmat qilishiga ishonamiz. Sizlar va yaqinlaringizdan agar bu choralar ayrim noqulayliklar tug‘dirayotgan bo‘lsa, ushbu holatni to‘g‘ri tushunishingizni va qo‘llab-quvvatlashingizni so‘rab qolamiz.
O‘z navbatida oldingi murojaatnomalarimizda qayd etganimizdek, barchangizdan kerakli ehtiyot choralarini ko‘rishingizni, xususan, barcha sanitariya-gigiyenik talablarga rioya qilishingizni, odamlar ko‘p to‘planadigan jamoat joylarida maxsus niqoblardan foydalanishingizni, go‘sht mahsulotlarini iste’mol qilishda uning yaxshi pishganligiga e’tibor qaratishingizni, maxsus gigiyenik dezinfeksiya va tozalash vositalaridan foydalanib yurishingizni so‘raymiz”, — deyiladi xabarda.
Kasallik alomatlarini (haroratning oshishi, yo‘tal, holsizlanish va hokazolar) sezgan fuqarolardan darhol maxsus tibbiyot muassasalariga murojaat qilish so‘raladi.
Elchixona konsullik bo‘limining +8170-1273-4900 telefon raqami har kuni 24 soat mobaynida murojaatlarni qabul qilishga tayyor. Aviaqatnovlar masalalari bo‘yicha +8170-1431-0026 raqamiga qo‘ng‘iroq qilish mumkin.
Bundan tashqari, kasallik alomatlarini sezgan fuqarolardan darhol +8150-3816-2787 raqamiga xabar berish va ularning ko‘rsatmalariga amal qilishingizni so‘ralmoqda.
“Kuzatilayotgan sharoitda elchixona hamma vatandoshlarimizga imkon qadar yordam berishga tayyor ekanligini bildiradi. Xususan, hozirgi kunda himoya niqoblari yetishmovchiligini inobatga olib, elchixona cheklangan miqdorda bo‘lsa ham niqoblar zaxirasiga ega ekanligini va ehtiyoj sezayotgan vatandoshlarimiz elchixonadan niqobni bepul olishi mumkinligini bildirmoqchimiz”, — deyilgan murojaatda.
Mavzuga doir: Toshkentga uchib kelgan Janubiy Koreyadagi o‘zbekistonliklar 14 kunlik karantinga joylashtiriladi
Izoh (0)