Жиззах вилояти Дўстлик туманининг «Манас» қишлоқ фуқаролар йиғинидаги очиқ даладан эгизак чақалоқлар жасади топилди. Бу ҳақда Жиззах вилояти ИИБ ахборот хизматига таяниб, «Kun.uz» хабар берди.
Ушбу маҳаллада истиқомат қилувчи Ў.Р. «Оқолтин остонаси кўрки» фермер хўжалиги ҳудудидаги бетон ариқ ёнидан сумка ичида қора рангли полиэтилен пакетга солинган эгизак ўғил чақалоқларни ўлик ҳолда топиб олган.
Шундан сўнг ҳудуд профилактика инспекторининг жамоат тартибини сақлаш бўйича ёрдамчисига бу ҳақда маълум қилган. Экспертиза хулосасига кўра, чақалоқлар 20-21 ҳафталик, кам вазнли бўлиб туғилган.
Олиб борилган тезкор суриштирув ишлари натижасида чақалоқларнинг онаси топилди. Чақалоқларни 1998 йилда туғилган Х.Г. туғиб, ташлаб кетгани аниқланди.
Ҳозирда суриштирув ишлари олиб борилмоқда.
Аввалроқ Фарғонада 20 ёшли қиз кўчадан чақалоқ топиб олганини айтиб ИИБга мурожаат қилгани, суриштирув натижасида чақалоқни унинг ўзи дунёга келтиргани аниқлангани ҳақида хабар берилганди.
Изоҳ (0)