Ўзбекистон Республикаси Вазирлар Маҳкамасида бош вазир ўринбосари Азиз Абдуҳакимов бошчилигида мамлакатга коронавирус кириб келиши ва тарқалишининг олдини олиш бўйича республика махсус комиссияси аъзолари иштирокида видеоселектор йиғилиши бўлиб ўтди. Бу ҳақда Соғлиқни сақлаш вазирлиги хабар берди.

Фото: «Дарё»

Маълум қилинишича, йиғилишда Вазирлар Маҳкамаси, Жаҳон соғлиқни сақлаш ташкилоти экспертлари, тегишли вазирлик ва идоралар раҳбарлари, Тошкент, Самарқанд, Бухоро ва Хоразм вилоятлари ҳокимларининг туризмни ривожлантириш масалалари бўйича ўринбосарлари ва ушбу ҳудудлардаги соҳа тадбиркорлари, хусусий сайёҳлик ташкилотлари уюшмаси, Отелерлар ассоциацияси, Ошпазлар, Рестораторлар уюшмалари раҳбарлари ва аъзолари қатнашди.

Йиғилишда коронавирус инфекциясининг Ўзбекистонга кириб келишининг олдини олиш бўйича кўрилаётган чора-тадбирлар ҳақида маълумотлар берилди. Жумладан, эпидемик вазиятдан келиб чиққан ҳолда мамлакатда юқумли касалликлар, жумладан, коронавирус инфекцияси кириб келишининг олдини олиш мақсадида давлат чегараларидаги мавжуд барча санитария-карантин пунктларида қатъий назорат ўрнатилиб, ушбу пунктлар замонавий тиббий жиҳозлар билан тўлиқ таъминлангани қайд этилди.

Видеоселекторда мутасадди ташкилотлар томонидан коронавируснинг туризм соҳасига салбий таъсирини камайтириш бўйича тегишли таклифлар ишлаб чиқилди.

Унда туризм соҳасида фаолият юритувчи тадбиркорлик субъектларини қўллаб-қувватлаш, ташқи таъсир омилини пасайтириш мақсадида ички туризмни ривожлантириш учун қўшимча имтиёз ва преференциялар бериш, коронавирус қайд этилмаган давлатлардан сайёҳларни жалб қилишга оид қўшимча чоралар кўриш, бу борада тарғибот-ташвиқот ишларини янада кучайтириш кўзда тутилади.

Шунингдек, бўлиб ўтган селектор йиғилишида сайёҳларнинг мамлакатга келиши жараёнида санитария талабларига тўлиқ риоя қилиш ва турли касалликлардан эҳтиёт чораларини кўриш масалалари ҳам муҳокама қилинди.

Маълумотларга кўра, ўтган йил якунлари бўйича мамлакатда 1500 га яқин сайёҳлик фирмаси ҳамда 1188 та турли даражадаги меҳмонхона фаолият кўрсатмоқда. Ўзбекистонга хориждан 6,7 миллион сайёҳ ташриф буюрган.

Йиғилиш сўнгида коронавируснинг туризмга таъсирини камайтириш борасида тезкор чора тадбирлар режаси қабул қилинишига келишиб олинди.

Аввалроқ Буюк Британиянинг машҳур журналларидан бири бўлган The Telegraph Ўзбекистонни сайёҳлар ташриф буюриши мумкин бўлган коронавирусдан холи 19 давлат рўйхатига киритган эди. Шунингдек, Ўзбекистон дунёда коронавирус тарқалгани туфайли тахминан бир миллиард доллар йўқотиши мумкинлиги маълум қилинди.